ამერიკაში, ყოველწლიურად 500 კაცი კვდება პენიცილინით, მაგრამ არავის უთქვამს უარი პენიცილინზე, – ამის შესახებ ინფექციური საავადმყოფოს დირექტორმა თენგიზ ცერცვაძემ ვაქცინაციაზე არსებულ სკეპტიციზმზე საუბრისას განაცხადა.
თენგიზ ცერცვაძის განცხადებით, ვაქცინაციისადმი უნდობლობა პირველივე დღეებში მომხდარმა ტრაგიკულმა შემთხვევამ განაპირობა.
„ამერიკაში, ამხელა ქვეყანაში ყოველ წელიწადს პენიცილინისა და მისი მონათესავე მედიკამენტებისგან 500 კაცი კვდება ანაფილაქსიური რეაქციით. ამერიკაში, ყოველწლიურად 500 კაცი კვდება პენიცილინით, მაგრამ არავის უთქვამს უარი პენიცილინზე. მაგრამ რადგან ჩვენთან ეს შემთხვევა მაინცდამაინც პირველ დღეებში მოხდა, ბუნებრივია, რომ ადამიანებში სკეპტიციზმმა დაისადგურა“, – განაცხადა ცერცვაძემ.
ცნობისთვის, 18 მარტს “ასტრაზენეკას” ვაქცინის გაკეთების შემდეგ 28 წლის ექთანი, მეგი ბაქრაძე ანაფელაქსიორი შოკის გამო გარდაიცვალა.
