„ისევ ჩვენი ოპონენტები ცრუ ინფორმაციას ავრცელებენ მოსახლეობაში და ცდილობენ, გააღიზიანონ ისინი, რომ ჩვენმა ყველა მეზობელმა დაიწყო ვაქცინაცია, ტყუილია. ვაქცინაცია დაიწყო თურქეთმა და აზერბაიჯანმა, მაგრამ ჩინური ვაქცინით, მას არ აქვს ჯანმოს აღიარება. სომხეთმა და რუსეთმა დაიწყეს რუსული ვაქცინით და ეს კიდევ უფრო მიუღებელია საქართველოს მოქალაქეებისთვის. მოლდოვას და უკრაინას, რომლებიც ჩვენსავით ელოდებიან ევროპულ, ამერიკულ ვაქცინებს, ჯერ ვაქცინაცია არ დაუწყიათ”, – ამის შესახებ „ინფექციური პათოლოგიისა და შიდსის ცენტრის“ დირექტორმა, თენგიზ ცერცვაძემ განაცხადა.
თენგიზ ცერცვაძის თქმით, საქართველო საშუალო შემოსავლის მქონე ქვეყანაა და ამის გამო შეექმნა პრობლემა ვაქცინაციასთან, რადგან ღარიბ ქვეყნებს, როგორც წესი, მდიდარი ქვეყნები ეხმარებიან.
„ხშირად ამბობენ, ღარიბმა ქვეყნებმა დაიწყეს ვაქცინაცია. დიახ, დღეს ვინ ახერხებს ვაქცინაციას? ძალიან მდიდარი ქვეყნები და ძალიან ღარიბი ქვეყნები, ვისაც საერთაშორისო თანამეგობრობა, კოვაქს პლატფორმა და ჯანმო აწვდის ვაქცინის გარკვეულ რაოდენობას, სწორედ იმიტომ, რომ ისინი ძალიან დაბალი შემოსავლის მქონე ქვეყნები არიან და არ აქვთ საშუალება ვაქცინა თვითონ შეიძინონ.
ყველაზე არასახარბიელო მდგომარეობაში აღმოჩნდნენ ე.წ. საშუალო შემოსავლის ქვეყნები, მათ შორის საქართველო, რომლებიც ვერ სარგებლობენ ძალიან ღარიბი ქვეყნებისთვის არსებული შეღავათებით და ამავე დროს არც ისეთი შეუზღუდავი რესურსები აქვს, რომ ნებისმიერ ფასად და ნებისმიერი გზით შემოიტანონ ვაქცინა და ჩვენ არ ვართ მარტო ამ დღეში. დაახლოებით ჩვენი განვითარების დონის ყველა ქვეყანა ასეა“, – განაცხადა ცერცვაძემ.
