აჭარის საზოგადოებრივი ჯანდაცვის ცენტრის ინფორმაციით, კოვიდ19-ის შემთხვევების დაფიქსირების გამო ორი სკოლა და ერთი ბაღი დროებით დაიხურა.

ბათუმის მე-14 და ქობულეთის მუნიციპალიტეტის სოფელ ლეღვას საჯარო სკოლები სწავლების ონლაინრეჟიმზე გადავიდნენ.

ბათუმის მე-14-ე საჯარო სკოლაში კორონავირუსით დირექტორი და დირექტორის მოადგილე არიან ინფიცირებული. ამავე სკოლაში რამდენიმე დღის წინ პედაგოგისა და ერთი მოსწავლის ინფიცირების შემთხვევა გამოვლინდა.​ ლეღვას საჯარო სკოლაში კოვიდ 19-ი. ერთ-ერთ პედაგოგსა და მოსწავლეს დაუდასტურდა.

ასევე კორონავირუსის შემთხვევები გამოვლინდა ხელვაჩაურის მეორე ბაღშიც, რომელიც დროებით დაიხურა.

„რიგ შემთხვევაში კორონავირუსით ინფიცირების შემთხვევები გამოვლინდა გეგმიური ტესტირების დროს, რიგ შემთხვევებში კი სიმპტომატურად.​ ეპიდემიოლოგების მიერ რისკების შეფასების შედეგად მიღებული იქნა გადაწყვეტილება 12 კალენდარული დღის განმავლობაში ორი სკოლისა და ერთი საბავშვო ბაღის დროებით დახურვის შესახებ.

განმეორებით ჩატარდება ტესტირება, შეფასდება რისკები და მხოლოდ ამის შემდეგ მიიღებენ ეპიდემიოლოგები სკოლებისა და ბაღის გახსნის გადაწყვეტილებას“,- აცხადებენ აჭარის საზოგადოებრივი ჯანდაცვის ცენტრში.

კორონავირუსი დაუდასტურდა ასევე ბათუმის პირველი საჯარო სკოლის პირველი კლასის მოსწავლეს. აღნიშნული კლასი ორი კვირით ონლაინსწავლებაზე გადავიდა.

ავტორი: ნაირა ქობულაძე