პრივატიზაციის დაჩქარების გეგმა და სახმელეთო საზღვრების გახსნის პროექტი სწორედ ეროვნული ვალუტის სტაბილურობის კონტექსტში განიხილება,- ამის შესახებ ეკონომიკის მინისტრმა, ნათია თურნავამ ჟურნალისტებთან განაცხადა.
„ყოველთვის ძალიან აქტუალური საკითხი არის ლარის კურსი. ამისთვისაც ჩვენ ვაჩქარებთ პრივატიზაციის პროცესს, რადგან უცხოური ინვესტიციები მოვიზიდოთ, რათა განმტკიცდეს ეკონომიკის მდგრადობა. მეორე საკითხი არის ჩვენი ტურიზმის გახსნა. ჩვენ უკვე ვფიქრობთ, რომ როგორც კი ეპიდემიური ვითარებიდან მოგვეცემა საშუალება სახმელეთო საზღვრებსაც გავხსნით. ნეგატიურ დაღს ასვამს ნეგატიური მოლოდინები და დიდი იმედი გვაქვს, რომ პოლიტიკური პროცესები ძალიან მალე დარეგულირდება”, – განაცხადა ნათია თურნავამ.
2020 წელს საქართველომ საერთაშორისო ტურიზმიდან $2.7 მილიარდი დოლარის შემოსავალი დაკარგა.
პრივატიზაციის მხრივ კი, საქართველოს მთავრობამ დღეს ბიზნესს ახალი პროექტი წარუდგინა, რომლის მიხედვითაც, გასაყიდად, დაახლოებით, 400 მილიონი ლარის ღირებულების ობიექტები უნდა გამოვიდეს. წელს მთავრობა პრივატიზაციიდან 150 მილიონი ლარის შემოსავალს ელოდება.
