შეფასებისა და გამოცდების ეროვნული ცენტრის ინფორმაციით, მათემატიკის გამოცდა დღეს, 14 ივლისს ერთ სესიად ჩატარდა. დარეგისტრირებული აბიტურიენტებიდან ტესტირებაზე 94%-ზე მეტი გამოცხადდა. მათ შორის იყო იმ აბიტურიენტთა ნაწილი, რომლებმაც გამოცდა 7 ივლისს კორონავირუსით დაინფიცირებულ აბიტურიენტთან ერთად ერთ საგამოცდო სივრცეში დაწერეს.
ზემოაღნიშნულ გამოსაცდელებს კორონავირუსი არ დაუდასტურდათ.
ცენტრის ცნობით, კარანტინში მყოფი აბიტურიენტების სამუშაო მაგიდები აღჭურვილია სამმხრივი გამჭვირვალე დამცავი ფარით/ბარიერით, რომლებიც დაშორებულია არანაკლებ ორმეტრიანი რადიუსის დისტანციით ერთმანეთისგან. სხვა აბიტურიენტებისგან განსხვავებით, წერის დროს ამ გამოსაცდელებისთვის აუცილებელია მხოლოდ პირბადის კეთება და ასევე გამოცდამდე PCR-ტესტის ჩატარება, რომელიც მათთვის უფასოა. აბიტურიენტები გამოცდებს მაქსიმალური უსაფრთხოების ზომების დაცვითა და შემუშავებული რეკომენდაციების შესაბამისად მშვიდ ვითარებაში აბარებენ.
ხვალ, 15 ივლისს აბიტურიენტები გამოცდას კვლავ მათემატიკაში, ერთ სესიად ჩააბარებენ.
