“პრაიმტაიმნიუსის“ ექსკლუზიური ინფორმაციით, საქართველოს პარლამენტის IV და V მოწვევის დეპუტატი კობა ამირხანაშვილი მთაწმინდა-კრწანისის მაჟორიტარობისთვის იბრძოლებს. სააგენტოს ინფორმაციით, ამირხანაშვილს მაჟორიტარობის კანდიდატად პოლიტიკური მოძრაობა „ტრიბუნა“ წარადგენს.
როგორც „ტრიბუნას“ დამფუძნებელმა დავით ჭიჭინაძემ “პრაიმტაიმნიუსთან” განაცხადა, ამირხანაშვილი მათი მაჟორიტარობის კანდიდატი იქნება და ის ჯანდაცვის მიმართულებით იმუშავებს.
„მთაწმინდა-კრწანისის რაიონში ჩვენი მაჟორიტარობის კანდიდატი იქნება საკმაოდ დიდი გამოცდილების მქონე, არა ერთხელ დეპუტატად მყოფი, დეპუტატთა პალატის თავმჯდომარე, კობა ამირხანაშვილი. მას ძალიან მნიშვნელოვანი პროგრამა აქვს საქართველოში განხორციელებული.
ამირხანაშვილს დიაბეტით დაავადებული მოზარდების ცენტრი აქვს შექმნილი და ამდენი წელიწადია ის ამ ცენტრს ხელმძღვანელობს. ვფიქრობ, ამ მიმართულებით ძალიან ბევრი ხარვეზი გაჩნდა, ის თვლის, რომ ჯანდაცვის მიმართულებით ძალიან სერიოზული ხარვეზებია და ამიტომ გადაწყვიტა პოლიტიკაში მობრუნება“,- განაცხადა ჭიჭინაძემ.
იმ შემთხვევაში, თუ კორონავირუსის პანდემიამ დღის წესრიგი არ შეცვალა, საპარლამენტო არჩევნები 2020 წლის 31 ოქტომბერს გაიმართება. არჩევნების შემდეგ, პარლამენტი 30 მაჟორიტარით და 120 – პროპორციულ სიაში შესული შესული დეპუტატით დაკომპლექტდება.
ავტორი: ეკატერინე ზარნაძე
