ბათუმის სამშობიაროში ამ ეტაპზე 23 კოვიდინფიცირებული პაციენტი იმყოფება. ამათგან ორი პაციენტის ჯანმრთელობის მდგომარეობა საყურადღებოა. აღენიშნებათ კორონავირუსისთვის დამახასიათებელი სიმპტომები. ასევე კლინიკაში მოთავსებულია კორონავირუსით ინფიცირებული ორი ახალშობილი.
როგორც კლინიკის დირექტორი ნუგზარ პაპავა „პრაიმტაიმნიუსთან“ აცხადებს, დღეს ერთი ორსული ქალბატონის რეფერირება იგეგმება ქუთაისში. ხოლო ერთი ქალბატონი ამ წუთებში შეიყვანეს სამშობიარო ბლოკში.
„ორ პაციენტს აღენიშნება სიცხე და სუნთქვის უკმარისობა. ამათგან ერთი განსაკუთრებით საყურადღებოა. აღენიშნება დამძიმებული ანამნეზი. არის 35 კვირის ორსული. ქალის და ნაყოფის მდგომარეობის გათვალისწინებით, მივიღეთ გადაწყვეტილება დღეს მოხდეს პაციენტის რეფერირება ქუთაისის მესამე დონის კლინიკაში. პაციენტს ესაჭიროება კატე კვლევა, შესაძლოა ახალშობილს რეანიმაციულ განყოფილებაში მოთავსება დასჭირდეს. ამიტომ ქუთაისში რეფერირება იგეგმება დღეს.
ამჟამად გვყავს კლინიკაში სამი ახალშობილი. აქედან ორი კოვიდდადებითია. მესამე ახალშობილი გუშინ შემოიყვანეს სხვა კლინიკიდან, როცა დედას დაუდასტურდა კოვიდ 19. მას დღეს აუღებენ ნიმუშს კვლევისათვის. ამ ეტაპზე ვერ გეტყვით აქვს თუ არა კორონავირუსი.
ერთი ახალშობილის რეფერირება მოხდა კლინიკა „მედინაში“. მას კორონავირუსი არ ჰქონდა. ახალშობილს გულის მანკი ჰქონდა და პროფილაქტიკის მიზნით გადავიყვანეთ სხვა კლინიკაში. დანარჩენი პაციენტების ჯანმრთელობის მდგომარეობა დამაკმაყოფილებელია. ამ ეტაპზე კლინიკაში გვყავს ორი 38 კვირის ორსული.
ერთ მათგანს დაეწყო მშობიარობა და ამ.წუთებში შეყვანილია სამშობიარო ბლოკში. იგეგმება ფიზიოლოგიური მშობიარობა. თუ გართულებები დაეწყო, შემდეგ დაიგეგმება საკეისრო კვეთა“, – აცხადებს ნუგზარ პაპავა.
