ახალქალაქისა და კუმურდოს მიტროპოლიტის მეუფე ნიკოლოზის განცხადებით, არასწორია იმის თქმა, რომ დეკანოზ გიორგი მამალაძის კლინიკაში გადაყვანას ხელს საპატრიარქო უშლიდა.
„მე ბევრჯერ მქონია შემთხვევა, როცა მივმართე ხელისუფლებას, რომ ავადმყოფი პატიმარი ან საავადმყოფოში გადაეყვანათ, ან ჯანმრთელობის მდგომარეობის გამო გაეთავისუფლებინათ. სხვა საკითხებში ვერ ვიტყვი, მაგრამ ამ თემაზე ჩვენს ქვეყანას აბსოლუტურად მტკიცედ ჩამოყალიბებული კანონმდებლობა აქვს ჯანმრთელობის როგორ შემთხვევაში როგორ რეაგირებს, რადგან, პირველ რიგში, მათ ინტერესებშია, რომ პატიმარს რამე არ დაემართოს”, – განაცხადა მეუფე ნიკოლოზმა.
დეკანოზ გიორგი მამალაძეს პროკურატურა შორენა თეთრუაშვილის მკვლელობის მომზადებას ედავება. მას ბრალი თავდაპირველად მკვლელობის მომზადებისა და იარაღის უკანონო შეძენა-შენახვაში ედებოდა, თუმცა მოგვიანებით პროკურატურამ მას ბრალი დაუმძიმა და ანგარებით განზრახ მკვლელობის მომზადების მუხლში გადაუკვალიფიცირდა. საგამოძიებო უწყების ვერსიით, არსებული მატერიალური და იერარქიული მდგომარეობის შენარჩუნებისა და მომავალში კარიერული წინსვლის უზრუნველსაყოფად, დეკანოზმა გიორგი მამალაძემ ანგარებით განიზრახა ძლიერმოქმედი მომწამვლელი ნივთიერების ციანიდის გამოყენებით შორენა თეთრუაშვილის მკვლელობა.
დეკანოზი სასამართლომ 5 სექტემბერს დამნაშავედ სცნო და 9 წლით თავისუფლების აღკვეთა შეუფარდა. ამასთან, მოსამართლის გადაწყვეტილებით, დეკანოზს ბრალი გადაუკვალიფიცირდა და მამა გიორგი მამალაძე შურისძიების მოტივით მკვლელობის მომზადებაში სცნო დამნაშავედ. ამასთან, პირველი ინსტანციის სასამართლოს გადაწყვეტილება სააპელაციო სასამართლომ ძალაში უცვლელად დატოვა.
