„ცესკოსთან“, სადაც აქციის მონაწილეები არიან შეკრებილები, სახალხო დამცველი მივიდა.
იქამდე, სახალხო დამცველმა განცხადება გაავრცელა. ნინო ლომჯარია პოლიციას მოუწოდებს, რომ არ გამოიყენოს მოქალაქეების მიმართ არაპროპორციული ძალა. ასევე სახალხო დამცველი ორივე მხარეს მოლაპარაკებისკენ მოუწოდებს.
შეგახსენებთ, ცესკოსთან მიმდინარე აქციაზე ვითარება დაიძაბა. მომიტინგეების მისამართით სამართალდამცველებმა წყლის ჭავლი გამოიყენეს. მანამდე აქციის მონაწილეები ცესკოს შენობის გარშემო არსებულ ღობეზე გადაძრომას ცდილობდნენ. ისინი თავიანთ პროტეტს ჯებირებზე ბრახუნითაც გამოხატავდნენ. აქციაზე მყოფ ერთ-ერთ მომიტინგეს თვალი დაუზიანდა, რომელსაც გავრცელებული ცნობით, წყლის ძლიერი ჭავლი მოხვდა.
ცნობისთვის, 8 ნოემბერს, პარლამენტთან მიმდინარე აქციაზე ნიკა მელიამ დემონსტრანტებს ცესკოსთან გადაადგილებისკენ მოუწოდა.
„ვერავინ იქ ვეღარ შევა, ვერავინ იქიდან ვეღარ გამოვა“, – განაცხადა მელიამ.
აქციის მონაწილეებმა ცესკოს შენობაში შესვლა სცადეს. გავრცელდა კადრები, რომელშიც ჩანს, როგორ ცდილობენ აქტივისტები ჯებირების მორღვევას. სიტუაცია კიდევ უფრო დაიძაბა, რაც ადგილზე სპეცრაზმი გამოჩნდა და მათი დაშლა დაიწყო. ცესკოსთან პოლიციამ მომიტინგეების მისამართით წყლის ჭავლი გამოიყენა.
