წალენჯიხის მუნიციპალიტეტის სოფელ ფოცხოეწერში სასტუმროს ყოფილ შენობაში აფეთქება მოხდა.
ადგილობრივების ცნობით, გაზის ბალონი იმ დროს აფეთქდა როცა ენგურჰესის სარეაბილიტაციო სამუშაოებზე დასაქმებული მუშები საუზმობდნენ.
წალენჯიხის მუნიციპალიტეტის მერის ბესიკ ფარცვანიას ინფორმაციით, შემთხვევის შედეგად არავინ დაშავებულა.
„გაზის ბალონი სამზარეულოში აფეთქდა, რა დროსაც ენგურჰესზე მომუშავე მუშების ნაწილს დასრულებული ჰქონდა ვახშმობა,ნაწილი კი შენობას ტოვებდა.მზარეულებმა კი დროზე მოასწრეს ევაკუაცია,საბედნიეროდ მსხვერპლი არ გვაქვს“,-ამბობს იგი.
საგანგებო სიტუაციების მართვის სამსახურში აცხადებენ,რომ აფეთქებამ ხანძარი გამოიწვია. მეხანძრეებმა მისი ჩაქრობა მოახერხეს. დამწვარია შენობის 30 კვ.მ ფართი.
ავტორი: თეა შონია
