აჭარის მთავრობის მეთაურის, თორნიკე რიჟვაძის განცხადებით, აჭარაში ტურისტული სეზონი 15 ივნისს ოფიციალურად გაიხსნება.
ამასთან, რიჟვაძემ მოქალაქეებს კორონავირუსის წინააღმდეგ, რეგულაციების დაცვისკენ მოუწოდა.
„ველით მზარდ ტურისტულ ნაკადს. განსაკუთრებით მნიშვნელოვანია ტურისტული სეზონისთვის მზადება. მინდა, ვთხოვო როგორც ტურიზმის დეპარტამენტს, ისე ყველა სხვა უწყებას, რომ 15 ივნისს ოფიციალურად გავხსნათ სეზონი.
რა თქმა უნდა, ეს ყველაფერი მაქსიმალური სიფრთხილით, ეპიდემიოლოგების გათვალისწინებით უნდა მოხდეს, რათა ეკონომიკასთან ერთად, სტაბილური ეპიდვითარება შევინარჩუნოთ. რა თქმა უნდა, მნიშვნელოვანია ის მიმდინარე პროექტები, რომლებიც ახალი ტურისტული მიმართულებების შექმნას ისახავს მიზნად.
განსაკუთრებით მისასალმებელია, რომ ახალი ატრაქციები იქნება არა მხოლოდ ბათუმში, არამედ – პრაქტიკულად, ყველა მუნიციპალიტეტში. ბუნებრივია, ჩვენ აქტიურად დავაკვირდებით ამ პროექტების დასრულებას“, – აღნიშნა თორნიკე რიჟვაძემ აჭარის მთავრობის სხდომაზე.
