„საბურთალოს“ ახალგაზრდა ფეხბურთელის, გიორგი შაქარაშვილის ცხედარი ლევან სამხარაულის სახელობის ექსპერტიზის ბიუროდან სახლში გადაასვენეს.
19 წლის ფეხბურთელის ბიძა, მირიან ნიკოლაძე იმედოვნებს, რომ ექსპერტიზა ყველა კითხვას პასუხს გასცემს.
„ვერსიები არის ბევრი, ხშირ შემთხვევაში ურთიერთგამომრიცხავი, ამიტომ მე იმედი მაქვს, რომ საბოლოო ჯამში გაირკვევა ექსპერტიზის დასკვნით, მაგრამ ის პირველადი კონტურები, რომელსაც ექსპერტიზა გამოკვეთს, რამდენად საკმარისი იქნება დასკვნებისთვის, ამას მე ვერ გეტყვით. შესაძლებელია, დამატებითი კვლევები დასჭირდეს, არა ვიზუალური დათვალიერება, არამედ ლაბორატორიული კვლევები და ამის შემდეგ გაირკვეს რამე“, – განაცხადა მირიან ნიკოლაძემ ჟურნალისტებთან საუბრისას.
ახალგაზრდა ფეხბურთელის ცხედარი მაშველებმა 4-დღიანი ინტენსიური ძებნის შემდეგ მდინარე არაგვში იპოვეს. გიორგი შაქარაშვილის ოჯახმა, მისი დაკარგვის შესახებ შსს-ს 19 ივნისს, 11:00 საათზე მიმართა.
