მინდა ვთქვა, რომ 30 წელი გავიდა, რაც ამ დარბაზში არ ვყოფილვარ. მაშინ ვიყავი უზენაესი საბჭოს წევრი. ამ 30 წლის განმავლობაში, სამწუხაროდ, ჩვენ ყველა გამოწვევა დაგვრჩა სახელმწიფოში, რომლის გადალახვაც თავისუფლად შეგვეძლო ამ პერიოდის განმავლობაში, – ამის შესახებ „ლელოს“ ლიდერმა ბადრი ჯაფარიძემ განაცხადა.
„კვლავ ბატონობს სიძულვილი, დაპირისპირება, სიღატაკე, უნდობლობა. სამწუხაროდ, ჩვენ ვერ მოვახერხეთ და პოლიტიკურმა კლასმა, რომ ქვეყანა მიეახლოვებინა ევროპული სტანდარტებისთვის. ახლა ევროკავშირის და შეერთებული შტატების მიერ, მედიაციით მომზადებული დოკუმენტი, რომელსაც ჩვენ შევუერთდით, ჩვენს ქვეყანას აძლევს შანსს, რომ დაიწყოს უმნიშვნელოვანესი რეფორმების განხორციელება. აუცილებელია, ეს დოკუმენტი სრულფასოვნად განხორციელდეს იმისათვის, რომ ჩვენ დავანახოთ, ჩვენს ამერიკელ და ევროპელ მეგობრებს, რომ საქართველო იმსახურებს ევროატლანტიკურ სტრუქტურებში სწრაფ გაწევრიანებას. ამისათვის აუცილებელია, დასრულდეს ყველა პოლიტიკური ნიშნის მატარებელი სისხლის სამართლის საქმე. ეს არის აუცილებელი, რომ საზოგადოება გაერთიანდეს.
ჩვენ ვნახეთ ბრიუსელში ჩვენი შეხვედრების დროს, ევროპარლამენტარებთან და ევროკომისიაში, რომ ჩვენი ევროპელი მეგობრები მზად არიან მხარი დაუჭირონ ჩვენს ქვეყანას, იმისათვის, რომ საქართველო რეალურად მოემზადოს ევროკავშირში გაწევრიანებისათვის. მათი მხრიდან გაჟღერებული იქნა ინიციატივა, ევროკავშირმა შემოიღოს საგზაო რუკა, ევროკავშირის მსურველი ქვეყნებისათვის. საქართველო შესაძლოა იყოს ამ საგზაო რუკის კანდიდატი, მაგრამ ამისათვის აუცილებელია, წელს ადგილობრივი არჩევნები ჩატარდეს ევროპული სტანდარტების შესაბამისად. ჩატარდეს ახალი ადმინისტრაციის პირობებში, განახლებული კანონმდებლობის პირობებში. ამ შემთხვევაში, ჩვენ მივიღებთ 2022 წელს რიგგარეშე საპარლამენტო არჩევნებს, რომლის შედეგად არჩეულ პარლამენტს ექნება ყველა უფლება მიმართოს ევროკავშირს განაცხადით, საქართველოს წევრობის კანდიდატის მიღების თაობაზე“, – განაცხადა ჯაფარიძემ.
