კრემლი ალექსანდრე ლუკაშენკოს ბელარუსის ლეგიტიმურ პრეზიდენტად ცნობს. ამის შესახებ რუსეთის პრეზიდენტის პრესმდივანი დიმიტრი პესკოვი აცხადებს.
„ალექსანდრე გრიგორევიჩი ბელარუსის ლეგიტიმური პრეზიდენტია“ – ხაზს უსვამს კრემლის წარმომადგენელი ჟურნალისტებთან შეხვედრისას მას შემდეგ, რაც სოჭში პუტინისა და ლუკაშენკოს ოფიციალური შეხვედრა დასრულდა.
პესკოვის თქმით, რუსეთში უყვართ და პატივს სცემენ ბელარუს ხალხს, იმის მიუხედავად უჭერენ თუ არა მხარს ლუკაშენკოს. „თუმცა, როგორც დასაწყისში პრეზიდენტმა ვლადიმერ პუტინმა განაცხადა, გვინდა, რომ ბელარუსში რაც ხდება კონსტიტუციის ფარგლებს არ გასცდეს“ – განმარტა პესკოვმა.
მისივე თქმით, ორი ქვეყნის ლიდერების შეხვედრისას არ განხილულა თემა ბელარუსის ტერიტორიაზე რუსული სამხედრო ბაზების განთავსების შესახებ. მათი საუბრის მთავარი თემა რუსეთისთვის დასაბრუნებელი ვალის რესტრუქტურიზაცია იყო.
ლუკაშენკოსა და პუტინის ოფიციალური შეხვედრა სოჭში 4 საათს გაგრძელდა.
