“წინასწარ ორგანიზებული სიძულვილით მოტივირებული ჯგუფური ძალადობის არც-ერთი ორგანიზატორი არ არის მიცემული სისხლის სამართლის პასუხისგებაში“,- ამის შესახებ განცხადებას დემოკრატიის კვლევის ინსტიტუტი ავრცელებს.
მათი თქმით, დანაშაულის ორგანიზატორების დაუსჯელობა ზრდის რისკს, რომ ისინი კვლავ ჩაიდენენ მსგავს ქმედებას.
“დემოკრატიის კვლევის ინსტიტუტი შინაგან საქმეთა მინისტრს მიმართავს და 5 ივლისის ძალადობრივი დარბევის ორგანიზატორების სისხლის სამართლის პასუხისგებაში მიცემის გაჭიანურების შესახებ საზოგადოებაში არსებულ კითხვებს უსვამს ხაზს.
დღეის მდგომარეობით, წინასწარ ორგანიზებული სიძულვილით მოტივირებული ჯგუფური ძალადობის არც-ერთი ორგანიზატორი არ არის მიცემული სისხლის სამართლის პასუხისგებაში. აღნიშნული მასშტაბის ძალადობრივი დანაშაულის ორგანიზატორების დაუსჯელობა, აძლევს მათ ახალი დანაშაულებრივი ქმედებების ჩადენის შესაძლებლობას და სახელმწიფოსა და საზოგადოების უსაფრთხოებისათვის კრიტიკული რისკების შემცველია.
საზოგადოებაში არსებული დასაბუთებული ეჭვის გასაქარწყლებლად, რომ მმართველი პოლიტიკური ელიტა თანამშრომლობს და ხელს აფარებს 5 ივლისზე პასუხისმგებელი ძალადობრივი ჯგუფების ლიდერებს, მნიშვნელოვანია მოხდეს გურამ ფალავანდიშვილის, „ალტ ინფოს“ გუნდის, ლევან ვასაძისა და მათთან დაკავშირებული ჯგუფების მიერ ორგანიზებული ჯგუფური ძალადობის სავარაუდო შემთხვევების მაქსიმალურად შემჭიდროებულ ვადებში გამოძიება და ჯგუფური ძალადობის ორგანიზატორების სისხლის სამართლის პასუხისგებაში მიცემა“,- აღნიშნულია დემოკრატიის კვლევის ინსტიტუტის მიერ გავრცელებულ განცხადებაში
ცნობისთვის, 5 ვლის ძალადობრივი ჯგუფები 55 ადამიანს ფიზიკურად გაუსწორდნენ მათგან 53 პირი მედიის წარმომადგენელია, რომლებიც ადგილზე პროფესიულ მოვალეობას ასრულებდნენ. დაშავებულთა შორის იყო უცხო ქვეყნის მოქალაქე, რომელიც ცივი იარაღით იმის გამო დაჭრეს, რომ მას საყურე ეკეთა. ტურისტს გადაუდებელი ოპერაცია დასჭირდა.
“TV პირველის“ ოპერატორი, ლექსო ლაშქარავა ცემიდან ერთი კვირის შემდეგ გარდაიცვალა.
მომხდართან დაკავშირებით 29 პირს აღმკვეთი ღონისძიების სახით პატიმრობა შეეფარდა, თუმცა დაკავებულთა შორის არ არის არცერთი ორგანიზატორი.
