“ერთიანი საქართველო-დემოკრატიული მოძრაობის” თავმჯდომარე, ნინო ბურჯანაძე ელისაშვილის გადაწყვეტილებას პარლამენტში შესვლის შესახებ ღალატს უწოდებს.
“აჭარის საზოგადოებრივ მაუწყებელზე” სტუმრობისას გადაცემაში “თავისუფალი სივრცე” ნინო ბურჯანაძემ განაცხადა, რომ საკუთარი თავის ღალატის გამო ალეკო ელისაშვილს პატივს არც “ქართული ოცნება” სცემს. ამის მაგალითად კი თეა წულუკიანი განცხადება გაიხსენა.
“ალეკო ელისაშვილს ძალიან კარგი პასუხი გასცა ქალბატონმა თეა წულუკიანმა, პირველად მოვიწონე და ალბათ ბოლოჯერ ქალბატონი წულუკიანის ნაბიჯი, რომელმაც უთხრა, რომ თუ არჩევნები გაყალბდა, აქ რა ჯანდაბა გინდაო. როდესაც შენ შენს თავს ღალატობ, არც იმ ადამიანებისგან იღებ პატივისცემას ვისაც უღალატე და არც იმ ადამიანებისაგან, ვისთანაც წახვედი და ვის გამოც უღალატე სხვას იმიტომ, რომ ყოველთვის არის იმის საშიშროება, რომ ხვალ უკვე სხვას უღალატებ. ამიტომ თავს ლაფი დაასხვა მას წულუკიანმა სრულიად დამსახურებულად”, – განაცხადა ნინო ბურჯანაძემ.
