საკოორდინაციო საბჭოს გადაწყვეტილებით, 1-ლი ოქტომბრიდან თბილისში, ქუთაისში, რუსთავსა და ზუგდიდში I-VI კლასების მოსწავლეები საკლასო ოთახებში დაბრუნდებიან. გარდა ამისა, მშობლებს ექნებათ დისტანციური სწავლების მეთოდის არჩევის შესაძლებლობა.
საქართველოს განათლების, მეცნიერების, კულტურისა და სპორტის მინისტრის, მიხეილ ჩხენკელის განმარტებით, განსაკუთრებით პატარებისთვისაა უაღრესად მნიშვნელოვანი, რომ სასწავლო პროცესი საკლასო ოთახებში იყოს.
მე-7 და მაღალი კლასის მოსწავლეების მშობლების გარკვეული ნაწილი ამ გადაწყვეტილებაზე პროტესტს გამოთქვამს და აცხადებს, რომ დისტანციური, ელექტრონული სწავლება არაეფექტურია, შედეგად ბავშვები უხარისხო განათლებას იღებენ, რაც ცუდად აისახება მომავალი თაობის განვითარებასა და წინსვლაზე.
რატომ მიიღეს გადაწყვეტილება, რომ კლასებში მხოლოდ პირველიდან მეექვსე კლასის მოსწავლეები ივლიან, ხოლო სხვა დანარჩენი ისევ დისტანციურ სწავლებაზე რჩება. ამ კითხვას განათლების მინისტრის მოადგილე ეკატერინე დგებუაძე პასუხობს.
„მოგეხსენებათ დაწყებით საფეხურზე განსაკუთრებით მნიშვნელოვანია სოციალიზაცია, ინტეგრაცია, სხვადასხვა უნარების განვითარება, წერა-კითხვა, ამ კუთხით პრიორიტეტი მივანიჭეთ დაწყებით საფეხურს, თუმცა აქვე მინდა ავღნიშნო, რომ ეს არ არის ცალსახად გადაწყვეტილება, რომ ზედა საფეხური არ, ან ვერ დაიწყებს. ჩვენ გვინდა, რომ დავაკვირდეთ პროცესებს და საკოორდინაციო საბჭოს კვლავ შევთავაზებთ ზედა საფეხურების გახსნას“,- განაცხადა ეკატერინე დგებუაძემ.
