აბაშაში მომხდარი ავტოსაგზაო შემთხვევის შედეგად ოთხი ადამიანი დაშავდა.
დაშავებულებიდან სასწრაფო-სამედიცინო დახმარების სამსახურმა სამი კლინიკა “არქიმედეში” გადაიყვანა, ხოლო ერთი “სენამედში”.
„არქიმედეში” გადაყვანილმა დაშავებულებმა კლინიკა თვითნებურად დატოვეს და გაიქცნენ.
„ორს მოვასწარი და დავაწერინე ხელწერილი, რომ თავიანთი სურვილით ტოვებენ კლინიკას. მესამემ არ დაწერა. თანხაც ჰქონდათ გადასახდელი. არ გადაუხდიათ ისე წავიდნენ. რისი თანხა, რა თანხაო, არ მაქვსო. სასწრაფომ ძალით წამომიყვანაო. კლინიკაში გადმოსაყვანი არაფერი არ მჭირდაო”, – აცხადებენ „არქიმედეში.”
მედიკოსების თქმით, ერთს წვივი ჰქონდა დაზიანებული. მეორეს გულმკერდის ტრამვა და დაჟეჟილობა აღენიშნებოდა. მესამისთვის კი თავის კატეს გადაღება მოინდომეს, თუმცა ის ექიმებს არ დაემორჩილა და წავიდა.
შინაგან საქმეთა სამინისტროს განცხადებით, გამოძიება 276-ე მუხლის მე-2 ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის დარღვევას გულისხმობს, რამაც ჯანმრთელობის ნაკლებად მძიმე დაზიანება გამოიწვია.
ავტორი: თეა შონია
