საპარლამენტო უმრავლესობის ლიდერი, მამუკა მდინარაძე გიორგი შაქარაშვილის საქმესთან დაკავშირებით მიხეილ სააკაშვილის მიერ გაკეთებულ განცხადებებს გამოეხმაურა.
მისივე თქმით, 19 წლის ბიჭის გარდაცვალების საქმეს “ნაციონალურ მოძრაობა” პარტიული მიზნებისთვის იყენებს.
„ძალიან სამწუხაროა, რომ უდიდესი ტრაგედია, რომელიც არის ახალგაზრდა კაცის გარდაცვალება და რომელზეც უკვე მკვლელობის მუხლითაც მიდის გამოძიება, მაშველ რგოლად მიიჩნიეს „ნაცმოძრაობის“ წარმომადგენლებმა და მათმა ტელევიზიებმა, რაც ამორალურია. რეალურად, გამოძიების ერთადერთი ინტერესია, რომ ამ საქმეზე დადგეს დეტალური, ამომწურავი სიმართლე. სხვა ინტერესი გამოძიებას არ აქვს და ნაცვლად იმისა, რომ გამოძიებას დავაცადოთ და თითოეულ ჩვენებას არ მივცეთ ინტერპრეტაცია, ვხედავთ პარალელურ გამოძიებას, ინტერპრეტირებულს, ძალიან ცუდად გადაცემულს საზოგადოებისთვის, რაც მხოლოდ და მხოლოდ ნიშნავს პიარულ პარტიულ მიზნებს. ადამიანის გარდაცვალებით პარტიებმა არ უნდა ისარგებლონ! ამაზე მაინც უნდა შევთანხმდეთ ამ ქვეყანაში, რომ პარტიული მიზნები არ შეიძლება აეწყოს და დაეფუძნოს ახალგაზრდა კაცის უდიდეს ტრაგედიას. ამას ვეხვეწებით ამ დღეების განმავლობაში პარტიულ ტელევიზიებს, რომ ნუ გამოიყენებთ პარტიული მიზნებისთვის და ხელისუფლების დაზიანებისთვის საქმეს, რომელიც 19 წლის ბიჭის გარდაცვალებას ეხება,“ – განაცხადა მდინარაძემ.
ცნობისთვის, მიხეილ სააკაშვილის განცხადებით, ფეხბურთელ გიორგი შაქარაშვილის გარდაცვალების საქმის „ჩაფარცხვაში“ ყველა ჩართულია.
