ახალციხის მუნიციპალიტეტის სოფელ აწყურთან სლესის, იგივე მოქცევის ციხე დაზიანდა. ჩამონგრეულია შუა საუკუნეების ციხე-კოშკის კუთხე, დაზიანების ამსახველი ფოტოს სოციალურ ქსელში არჩილ მაისურაძემ გამოაქვეყნა.
„სამწუხარო ფაქტი. ჩამოინგრა სლესის ციხის კოშკის კუთხე. ამა წლის შემოდგომით ის ჯერ კიდევ დაუზიანებელი იყო. მცირე ნაწილია, მაგრამ ფერდობი მოფენილია ახლად ჩამოცვენილი “ცხელ-ცხელი” ქვებით”, – წერს მომხმარებელი.
მის პოსტს კულტურული მემკვიდრეობის დაცვის ეროვნული სააგენტოს გენერალური დირექტორი გამოეხმაურა. ნიკა ანთიძემ აღნიშნა, რომ ექსპერტების ჯგუფი ციხის დაზიანებას ადგილზე შეისწავლიდა. მოკვლევის შემდეგ დადგინდა, რომ დაზიანება მეხის ჩამოვარდნამ გამოიწვია. საზოგადოებასთან ურთიერთობის სამსახურში განმარტავენ, რომ ციხის რეაბილიტაცია სააგენტოს გეგმაში ჰქონდა, თუმცა ამ შემთხვევამ მოვლენები დააჩქარა.
„2021 წლის ზამთრის თვეებში, სააგენტო უზრუნველყოფს სლესის ციხის საკონსერვაციო პროექტის მომზადებას. პროექტის შეძენის შემდეგ, გაზაფხულის სეზონიდან სლესის სრულფასოვანი კონსერვაციისა და რესტავრაციის პროექტი დაიწყება და დაახლოებით, 2 წლის განმავლობაში გაგრძელდება“, – განაცხადა სააგენტოს საზოგადოებასთან ურთიერთობის სამსახურის უფროსმა. ბექა ბარამიძემ აღნიშნა, რომ რეაბილიტაციას ფონდი „ქართუ“ დააფინანსებს. მისივე თქმით, კონსერვაცია-რესტავრაციის შემდეგ გეგმაშია ინფრასტრუქტურული ელემენტების მოწყობასაც, რის შემდეგაც ტურისტული თვალსაზრისით, სლესის ციხე თვალსაჩინო ობიექტი გახდება.
ციხეს ადრეფეოდალური ხანის ნაგებობებისათვის დამახასიათებელი ნიშნები გააჩნია. მას არ აქვს სათოფურები. იგი სტრატეგიულად მოხერხებულ ადგილზეა აგებული და ბუნებრივადაც საკმაოდ დაცულია. ციხიდან მტკვრის დინება ორივე მიმართულებით კარგად კონტროლდება.
2006 წლის 7 ნოემბერს, საქართველოს პრეზიდენტის ბრძანებულების თანახმად, სლესის ციხეს ეროვნული მნიშვნელობის კულტურის უძრავი ძეგლის კატეგორია მიენიჭა.
ავტორი: რუსკა გვარამაძე
