საგანგებო სიტუაციების მართვის სამსახურის ცნობით, ახვლედიანის ქუჩაზე გაჩენილი ხანძარი ლიკვიდირებულია. მათივე ცნობით, შემთხვევის შედეგად არავინ დაშავებულა.
ადგილზე მუშაობდა 9 სახანძრო-სამაშველო ჯგუფი. მობილიზებული იყო ყველა შესაბამისი სამსახური.
„შინაგან საქმეთა სამინისტროს საზოგადოებრივი უსაფრთხოების მართვის ცენტრ “112” -ში შემოსული ინფორმაციის თანახმად თბილისში, გიორგი ახვლედიანის ქუჩაზე არსებული საცხოვრებელი სახლის პირველ სართულზე იყო ხანძარი და საჭირო იყო სახანძრო-სამაშველო ძალების დახმარება.
შეტყობინების მიღებისთანავე, შემთხვევის ადგილზე გავიდნენ საგანგებო სიტუაციების მართვის სამსახურის თანამშრომლები. მათი გადმოცემით, ხანძარი რესტორნის სამზარეულოში გაჩნდა, შემდეგ კი, შენობის მეორე სართულზე, საცხოვრებელ სახლში გავრცელდა.
იყო ცეცხლის დიდ ფართობზე გავრცელების საფრთხეც, თუმცა მეხანძრე-მაშველებმა დროულად მოახერხეს ხანძრის ლოკალიზება და შემდეგ სრული ლიკვიდირება“, – აღნიშნულია საგანგებო სიტუაციების მართვის სამსახურის განცხადებაში.
