ამერიკის შეერთებულმა შტატებმა უკრაინელ ბიზნესმენს იგორ კოლომოისკის სანქციები დაუწესა. სანქცია ეხება ბიზნესმენის მეუღლეს და ორ შვილსაც.
კონკრეტულად კი, მათ აშშ-ში შესვლა ეკრძალებათ. ამ საკითხზე აშშ-ის სახელმწიფო მდივნის ენტონი ბლინკენის განცხადებას სახელმწიფო დეპარტამენტი ავრცელებს.
განცხადების თანახმად, უკრაინელი „ოლიგარქი და ყოფილი საჯარო მოხელე იგორ კოლომოისკი მონაწილეობდა მნიშვნელოვანი დონის კორუფციაში“ და აშშ-ის ზომებიც თანამდებობაზე მისი ყოფნის პერიოდში ჩადენილ ქმედებეს ეხება.
„2014-2015 წლებში უკრაინის დნეპროპეტროვსკის ოლქის გუბერნატორის მოვალეობის ოფიციალურად შესრულებისას, კოლომოისკი მონაწილეობდა კორუფციულ ქმედებებში, რამაც შეარყია კანონის უზენაესობა და უკრაინის საზოგადოების რწმენა მათი მთავრობის დემოკრატიული ინსტიტუტებისა და საზოგადოებრივი პროცესების მიმართ, მათ შორის ის იყენებდა პოლიტიკური გავლენისა და ოფიციალურ ძალაუფლებას მისი პირადი სარგებლისთვის“, – ნათქვამია ბლინკენის განცხადებაში.
აქვე იგი შეშფოთებას გამოთქვამს, რომ კოლომოისკის ამჟამინდელი და მიმდინარე ძალისხმევა მიმართულია უკრაინაში დემოკრატიული პროცესებისა და ინსტიტუციებისთვის ძირის გამოთხრისკენ, რაც ქვეყნის მომავლისთვის სერიოზულ საფრთხეს წარმოადგენს.
