აფხაზეთის დე ფაქტო პრეზიდენტის მრჩეველი და პარტია “ეროვნული ფრონტი აფხაზეთის” თავმჯდომარე ლაშა საქანია ოკუპირებულ ტერიტორიაზე „პატრიოტთა ალიანსის“ ლიდერის, ირმა ინაშვილის ვიზიტს გამოეხმაურა და განაცხადა, რომ სურს მეტი სიცხადე შეიტანოს ამ ფაქტში.
იგი აფხაზურ გამოცემასთან ადასტურებს აფხაზეთში „პატრიოტთა ალიანსის“ ლიდერების ვიზიტს.
ლაშა საქანიას თქმით, აგვისტოს დასაწყისში მას დაუკავშირდნენ ძველი მეგობრები რუსეთის ფედერაციიდან თხოვნით, დახმარებოდნენ ღვთისმშობლის ნაჩუქარი ხატის საქართველოდან ილორის ტაძარში გადატანაში. მათ ამ თხოვნით დავით თარხან-მოურავმა მიმართა.
საქანიას განცხადებით, რუსმა მეგობრებმა სთხოვეს, ორგანიზება გაეწია ჩამოსვლის და ხატის გადაცემისთვის. ასეც მოიქცნენ და როგორც განმარტავს, ამით მათი ჰუმანიტარული მისია ამოიწურა.
„სრული პასუხისმგებლობით ვაცხადებ, რომ არც მე და არც პარტიის თანათავმჯდომარე ალექსანდრ აგრბას, რომელსაც ვთხოვე ჩემთან ერთად ყოფილიყო, მოლაპარაკებები არავისთან გაგვიმართავს. ეს იყო წმინდა ჰუმანიტარული აქცია, რაც მთხოვეს ჩემმა მეგობრებმა რუსეთიდან ყოველგვარი პოლიტიკური ასპექტების და შედეგების გარეშე. ხატის გადაცემის შემდეგ ადამიანებმა ილოცეს და ამით მათი ვიზიტიც დასრულდა“, – აცხადებს ლაშა საქანია.
მის კომენტარს აფხაზური გამოცემა „აფსადგილ ინფო“ ავრცელებს.
მისივე თქმით, შეგნებულად არ მიაწოდა ინფორმაცია გალის ე.წ. ადმინისტრაციის ხელმძღვანელს და ე.წ.საგარეო საქმეთა სამინისტროს, რათა ვიზიტს არ მისცემოდა რაიმე ოფიციალური სტატუსი.
მანამდე კი ,მედიით გავრცელდა ინფორმაცია რომ ირმა ინაშვილმა და პარტიის ლიდერებმა 18 აგვისტოს უპრობლემოდ გადალახეს ენგურის ხიდი და გადავიდნენ აფხაზეთში.
მიბრუნებულზე კი ისინი საზღვრის კვეთის შემდეგ აღმოჩდნენ განმუხურის საკარანტინო სივრცეში და ტესტის აღების შენდეგ თვითიზოლაციაში გადავიდნენ ბათუმში.
ავტორი: თეა შონია
