„ჩვენ არანაირი პრეტენზია არ შეიძლება გვქონდეს აზერბაიჯანთან მიმართებაში და ეს ჩვენმა კოლეგებმა ძალიან კარგად გაიგეს“,- ამის შესახებ საგარეო საქმეთა მინისტრმა, დავით ზალკალიანმა მთავრობის სხდომის დასრულების შემდეგ განაცხადა.
როგორც იგი ამბობს, დელიმიტაცია დემარკაციის პროცესთან დაკავშირებით აზერბაიჯანელ კოლეგებთან საუბარი საქართველოში ვიზიტის დროსაც იყო.
„უნდა აღინიშნოს, რომ აზერბაიჯანი რჩება საქართველოს სტრატეგიულ ქვეყნად და მეგობრად და ვერანაირი საგამოძიებო პროცესი და ახალი გარემოებები ვერ მოახდენს გავლენას ჩვენს პარტნიორობაზე. როდესაც განხორციელდა აზერბაიჯანის საგარეო საქმეთა მინისტრის ვიზიტი საქართველოში, ჩვენ გვქონდა შინაარსიანი სუბარი ამ პროცესთან დაკავშირებით დავით გარეჯთან მიმართებაში, რადგან ეს არის სენსიტიური თემა ჩვენს ურთიერთობებში და მას მიეწოდა სრული ინფორმაცია, რაც არის აღმოჩენილი გამოძიებაში და შევთანხმდით, რომ აუცილებელია საგნობრივი მუშაობის გაგრძელება კომისიის ფარგლებში, რათა კომისიამ ორივე მხარის გათვალისწინებით მიიღოს გადაწყვეტილება. ჩვენ არანაირი პრეტენზია არ შეიძლება გვქონდეს აზერბაიჯანთან მიმართებაში და ეს ჩვენმა კოლეგებმა ძალიან კარგად გაიგეს.
სამწუხაროდ ვიზიტის შემდეგ ვნახეთ უსაფუძვლო შეტევა პირადად ჩემზე, ხელისუფლებაზე ოპოზიცის მხრიდან, რომ თითქოს ხდება საკითხის პოლიტიზაცია, უსაფუძვლო ბმა მიმდინარე ესკალაციასთან, რომელიც მიმდინარეობს აზერბაიჯანსა და სომხეთს სორის. ჩვენი ვიზიტი შედგა 24 სექტემბერს, საომარი პროცესის დაწყებამდე“,- განაცხადა დავით ზალკალიანმა.
ცნობისთვის, საქართველოს პროკურატურამ დავით გარეჯის საქმეზე საზღვრების დამდგენი კომისიის ყოფილი თავმჯდომარე და კომისიის ყოფილი წევრი დააკავა. კერძოდ – საქართველოს საგარეო საქმეთა სამინისტროს მეზობელი ქვეყნების დეპარტამენტის სასაზღვრო ურთიერთობათა სამსახურის უფროსი – ივერი მლაშვილი და საქართველოს შს სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.
