საპარლამენტო უმრავლესობის წევრი, არჩილ თალაკვაძე პარლამენტში მიმდინარე მოვლენებს ეხმაურება. როგორც თალაკვაძე ამბობს, არავის მიეცემა უფლება, ინსტიტუტებს პრობლემა შეუქმნან და პარლამენტის მუშაობა შეაფერხონ.
„არავის მივცემთ უფლებას, რომ ინსტიტუტებს შეუქმნან პრობლემა და პარლამენტის მუშაობა შეაფერხონ. ამიტომ, უმოკლეს დროში აღდგება სხდომა და განაგრძობს მუშაობას.
ხედავთ, აქ არის ყველა დეპუტატი, მათ შორის ოპოზიციის წარმომადგენლები, ეს გახლავთ სიცრუე. რაც შეეხება გარეშე მესამე პირთა დაშვებას პარლამენტში, ამას არეგულირებს რეგლამენტის სპეციალური მუხლი. შესაბამისად, პარლამენტის თავმჯდომარემ სავარაუდოდ ამ მუხლით იხელმძღვანელა“, – განაცხადა არჩილ თალაკვაძემ.
ამ დროისთვის პარლამენტში ხმაური ისევ გრძელდება. რიგგარეშე სხდომა საკანონმდებლო ორგანოში შექმნილი აურზაურის გამო ვერ ტარდება. პარლამენტში არც ჟურნალისტების ნაწილს უშვებენ.
