არჩევნებამდე რამდენიმე თვით ადრე შესაძლოა „ძალა ერთობაშია“ დაიშალოს. დღევანდელ შეხვედრაზე, რომელიც გაერთიანება „ძალა ერთობაშიას“ ოფისში გაიმართა „ნაციონალური მოძრაობის“ წევრები არ მივიდნენ.
„ევროპული დემოკრატების“ ლიდერი, პაატა დავითაია აცხადებს, რომ „ნაციონალურმა მოძრაობამ“ ჩამოსაყალიბებლად გარკვეული ვადა ითხოვა.
„თუ ზოგიერთი ფიქრობს, რომ საპრეზიდენტო არჩევნებში „ნაციონალურმა მოძრაობამ“ მიიღო მარტო ხმები, ეს ასე არ არის. ეს იყო ერთიანი კანდიდატის მიღებული ხმები. თუ მათ სურთ ხელისუფლების შეცვლა, ეს უნდა იყოს ერთიან ფორმატში „ძალა ერთობაშია“, როგორც მოხდა შეთანხმება. და თუ მათ სურთ ოპოზიციაში დარჩენა, ეს იქნება მხოლოდ და მხოლოდ „ნაციონალური მოძრაობის საარჩევნო კამპანია“, – აცხადებს პაატა დავითაია.
ოპოზიციაში იმედოვნებენ, რომ „ნაციონალური მოძრაობაში“ მალე ჩამოყალიბდებიან, რადგან სხვა შემთხვევაში ისინი დამარცხებისთვის არიან განწირულნი.
პარტია „კანონი და სამართალის“ დამფუძნებლისთვის გაუგებარია კიდევ რა დრო სჭირდება „ნაციონალურ მოძრაობას“ საბოლოო საარჩევნო პროექტისთვის.
„ის 6 მანდატი რომ გამოაცხადე და რომ თქვი, 6 მანდატი არადა 2 ჩვენ, ვის? ვის მიეცი ეს 6 მანდატი და ვინ დათანხმდა ამ გაცემაზე. ნახეთ, რომ „ძალა ერთობაშია“ არ დათანხმებულა. „ნაციონალურმა მოძრაობამ“ დამოუკიდებლად გამოაცხადა ის ორი მანდატი“, – ამბობს თაკო ჩარკვიანი.
შეგახსენებთ, რომ მოძრაობის „ძალა ერთობაშია“ საბურთალოს მაჟორიტარობის კანდიდატი პარტია „კანონი და სამართალის“ დამფუძნებელი თაკო ჩარკვიანი იქნება.
მანამდე კი ოპოზიციამ საერთო მაჟორიტარი კანდიდატები დაასახელა. ელენე ხოშტარია ვაკეში იყრის კენჭს, ნიკა მელია – გლდანში, გიორგი ვაშაძე – ისანში, ლევან ხაბეიშვილი – სამგორში, შალვა შავგულიძე კი მთაწმინდაზე.
ცნობისთვის, არსებობს წერილობითი შეთანხმება, რომლის მიხედვითაც, მომავალ საპარლამენტო არჩევნებში „ძალა ერთობაშია“ კოალიციის სახით უნდა გასულიყო.
არსებული ინფორმაციით, „ძალა ერთობაშიას“ აქვს მემორანდუმი, რომელსაც ხელს 10 პოლიტიკური პარტიის პირველი პირი აწერს, სადაც მხარეები თანხმდებიან, რომ საპარლამენტო არჩევნებში, „ძალა ერთობაშია“ კოალიციური ფორმით უნდა წარდგეს.
