„ამ არჩევნებს და საპარლამენტო სავარძლებს ნუ გადავაყოლებთ ამ ქვეყანას“ – ამის შესახებ პრემიერ-მინისტრმა გიორგი გახარიამ ჟურნალისტებთან საუბრისას განაცხადა.
პრემიერი ასევე გამოეხმაურა ოპოზიციური პარტიების მიერ გავრცელებულ განცხადებას, სადაც ოპონენტების წინააღმდეგ ხელისუფლების ზეწოლაზეა საუბარი.
„რა პოლიტიკურ ზეწოლაზეა საუბარი, ხალხო. თვითონ რაზეც უნდა, იმაზე შეუძლია ისაუბროს. არჩევნებში ვართ და ცხადია, ზოგი პოლიტიკურ ზეწოლაზე ისაუბრებს, ზოგი მედიაზე ზეწოლაზე, მაგრამ არსებობს გარემო, როდესაც ამ ქვეყანაში გამოხატვის თავისუფლება არავის შეუზღუდავს. ვსაუბრობთ ღიად ყველასთან ყველაფერზე და მოდით, ასე გავაკეთოთ: არჩევნების ღირსეულად ჩატარება მხოლოდ და მხოლოდ ერთი პარტიის ან საზოგადოების რაღაც ნაწილის მიზანი არ უნდა იყოს. ჩვენი ყველას მიზანი ეს უნდა იყოს, იმიტომ, რომ არჩევნებით შეაფასებენ ერთ რომელიმე პოლიტიკურ ძალას კი არა, არამედ – ქვეყანას. როდესაც უკვე თითქმის პროპორციული საარჩევნო სისტემა, საპარლამენტო დემოკრატია გვაქვს, ამ ქვეყანას შეუძლია, რომ დემოკრატიის თვალსაზრისით შემდგომი ნაბიჯი გადადგას და ეს ყველამ ერთად უნდა გავაკეთოთ. ჩვენი ქვეყნის წინსვლა და წარმატება ჩვენი ყველას ერთობლივი შრომის შედეგი უნდა იყოს. ამ არჩევნებს და საპარლამენტო სავარძლებს ნუ გადავაყოლებთ ამ ქვეყანას რა!“ – განაცხადა გახარიამ.
შეგახსენებთ, რომ ბუტა რობაქიძის საქმესთან დაკავშირებით 22 ივლისს ირაკლი ოქრუაშვილის სასამართლო პროცესი გაიმართება.
აღნიშნულ საქმესთან დაკავშირებით ოპოზიციურმა პარტიებმა ერთობლივი განცხადება გაავრცელეს, სადაც ნათქვამია, რომ ოქრუაშვილთან დაკავშირებული სისხლის სამართლის საქმის „გაცოცხლებით“, ხელისუფლება ოპონენტებზე ზეწოლას ცდილობს.
