პარტია „გამარჯვებული საქართველოს“ ყოფილი წევრი კოტე კემულარია 2020 წლის საპარლამენტო არჩევნებში მონაწილეობის მიღებას აანონსებს. როგორც კემულარიამ „პრაიმტაიმნიუსთან“ საუბრისას განაცხადა, ის გარკვეულ პარტიასთან, რომლის ვინაობას კემულარია, ჯერჯერობით, არ ასაჯაროებს, პოლიტიკურ კონსულტაციებს აწარმოებს.
„ვრჩები აქტიურ პოლიტიკაში. ძალიან ბევრ პოლიტიკურ ძალასთან, რომელიც ოპოზიციაშია და დასავლური ღირებულებები ჩვენი ქვეყნის მთავარ ორიენტირად მიაჩნია, მაქვს კონსულტაცია. მე ყველასთან მაქვს, მათ შორის, ნიკა მელიასთან და სხვებთან ურთიერთობები. ჩვენ ერთად ვართ ამ დიდ ოპოზიციურ გაერთიანებაში.
მე, შესაძლოა, რომელიმე პარტიასთან გავერთიანდე, მაგრამ ეს მოგვიანებით გადაწყდება. არჩევნებში მონაწილეობის მიღება გადაწყვეტილი მაქვს, მაჟორიტარობას არ ვაპირებ“,- განაცხადა კემულარიამ.
ინფორმაციისთვის, საპარლამენტო არჩევნები 2020 წლის 31 ოქტომბერს გაიმართება. საპარლამენტო არჩევნების შემდეგ, პარლამენტში 30 მაჟორიტარი და 120 პროპორციულ სიაში შესული დეპუტატი შევა.
ავტორი: ეკატერინე ზარნაძე
