საქართველოს საფეხბურთო ნაკრების მწვრთნელს ვლადიმირ ვაისის რუსული გამოცემა ria.ru-ს ჟურნალისტი დაუკავშირდა და სომხეთის ნაკრების წინააღმდეგ მოახლოებული მატჩის შესახებ ჰკითხა.
ჟურნალისტის კითხვა აზერბაიჯანსა და სომხეთს შორის განვითარებული კონფლიქტის პირობებში მატჩის ჩატარების შესაძლებლობას ეხებოდა.
ამ კითხვამ სლოვაკი სპეციალისტის გაღიზიანება გამოიწვია და ჟურნალისტს უპასუხა, რომ მისი უახლოესი საფიქრალი მხოლოდ ბელარუსთან მატჩს ეხება.
„რატომ მეკითხებით სომხეთზე?! ახლა მთელი ყურადღება და ძალა ბელარუსთან თამაშისთვის გვაქვს გამახვილებული. ამის შემდეგ ვიფიქრებთ ერთა ლიგაზე – სომხეთთან და ჩრდ. მაკედონიასთან თამაშზე. რაც შეეხება პოლიტიკას და არასამშვიდობო მდგომარეობას, ასეთ კითხვებზე პასუხს არ გაგცემთ“, – განუცხადა ვაისმა რუს ჟურნალისტს სატელეფონო საუბრისას.
შეგახსენებთ, რომ უეფას ერთა ლიგის ფლეი-ოფის პირველ მატჩში საქართველოს ნაკრები 8 ოქტომბერს „დინამო არენაზე“ ბელარუსის ნაკრებს შეხვდება. 11 ოქტომბერს ჩვენი გუნდი ამჯერად ერთა ლიგის მესამე დივიზიონის ჯგუფური ეტაპის შეხვედრაში სომხეთის ნაკრებს ესტუმრება, 14 ოქტომბერს კი ასევე სტუმრად ჩრდ. მაკედონიის ნაკრებს დაუპირისპირდება.
