ამერიკის შეერთებული შტატები პროგრამა „კოვაქსისთვის“ ოთხ მილიარდ დოლარს გამოყოფს. ამის შესახებ თეთრი სახლის ოფიციალურ ვებგვერდზე გამოქვეყნებულ განცხადებაშია ნათქვამი.
„კოვიდ-19“-მა აჩვენა, რომ ვერც ერთი ქვეყანა ვერ იმოქმედებს მარტო პანდემიის წინააღმდეგ. დღეს პრეზიდენტი დგამს ნაბიჯს მსოფლიოში ყველაზე მოწყვლადი მოსახლეობის მხარდასაჭერად და „კოვიდ-19“-ის წინააღმდეგ ამერიკელების დასაცავად“, – ნათქვამია თეთრი სახლის განცხადებაში.
ამასთან, პრეზიდენტის ადმინისტრაცია აღნიშნავს, რომ „კოვაქსისთვის“ გათვალისწინებული თანხის გამოყოფა 2021-2022 წლებში მოხდება.
„მთელ მსოფლიოში ვირუსის გავრცელების გაგრძელებასთან და ახალი ვარიანტების წარმოშობასთან ერთად, ნათელია, რომ კრიტიკულად მნიშვნელოვანია, რაც შეიძლება მეტი ადამიანისთვის ვაქცინაციის რაც შეიძლება სწრაფად ჩატარება. ხვალ „დიდი შვიდეულის“ ფარგლებში პრეზიდენტი გამოაცხადებს კონკრეტულ ნაბიჯებს მსოფლიოში მოწყვლადი მოსახლეობის დაცვით ამერიკელების ჯანმრთელობისა და უსაფრთხოების დასაცავად“, – ნათქვამია განცხადებაში.
