აჭარაში კორონავირუსის კიდევ ერთი ლაბორატორიულად დადასტურებული შემთხვევა დაფიქსირდა. ინფიცირებული სატვირთო ავტომანქანის მძღოლია. მას თურქეთიდან შემოსვლისას გეგმიური ტესტირების ჩატარების შედეგად კოვიდ 19 დაუდასტურდა.
ამჟამად პაციენტი რესპუბლიკური საავადმყოფოს კოვიდ ცენტრში გადის მკურნალობის კურსს. „
გასული 24 საათის განმავლობაში ერთი ინფიცირებული დაგვემატა, ეს პაციენტი მძღოლია, საქართველოს მოქალაქეა და თურქეთიდან შემოვიდა. მას ტესტირება ჩაუტარდა და კოვიდ 19 დაუდასტირდა, პაციენტს ჩივილები არ აღენიშნება. ამჟამად ბათუმის რესპუბლიკურ საავადმყოფოში 17 დადასტურებული შემთხვევა გვაქვს, აქედან 16 პაციენტის ჯანმრთელობის მდგომარეობა სტაბილურია, ერთი პაციენტი კი მძიმედ გვყავს და მას ინტენსიური მკურნალობა უტარდება”- განაცხადა რესპუბლიკური საავადმყოფოს კლინიკურმა მენეჯერმა გია კიკაბიძემ.
დაავადებათა კონტროლის აჭარის სამმართველოსა და ქალაქ ბათუმის ინფექციური საავადმყოფოს ლაბორატორიებში ჩატარებული 1001 ლაბორატორიული კვლევის შედეგი უარყოფითია.
ამჟამად რესპუბლიკური საავადმყოფოს კოვიდ ცენტრში მკურნალობის კურსს გადის 17 პაციენტი. ცხელების კლინიკებში მოთავსებულია 50 პირი, მათი კვლევის პასუხები ხვალ გახდება ცნობილი. ჯამში აჭარაში კორონავირუსზე PCR ტესტი ჩაუტარდა 41 131 პირს. დღეს არსებული მონაცემებით კარანტინში იმყოფება 2623 პირი. კარანტინი დატოვა 13 230-მა პირმა.
ავტორი: ნაირა ქობულაძე
