აჭარის განათლების, კულტურისა და სპორტის მინისტრმა მაია ხაჯიშვილმა არ დააკმაყოფილა EMC-სა და საზოგადოება “ბათომის” მოთხოვნა კულტურული მემკვიდრეობის ძეგლის ტერიტორიაზე ბათუმის ბულვარში 16 სართულიანი სასტუმრო კომპლექსისა და გამაჯანსაღებელი ცენტრის მშენებლობის შეჩერებისა და მშენებლობის ნებართვის გაუქმების შესახებ.
“შპს ” ამბასადორი ბათუმის” საკუთრებაში არსებული მიწის ნაკვეთი, რომელზეც გაცემული ნებართვის საფუძველზე მიმდინარეობს ბალნეოლოგიური ცენტრის სამშენებლო სამუშაოები, მდებარეობს ქალაქ ბათუმში სულიკო ჟღენტის ქუჩა 6-ში…
„ამბასადორი ბათუმის” საკუთრებაში რეგისტრირებული მიწის ნაკვეთის სამომხმარებლო ფუნქციონირება არ იკვეთება ბათუმის ბულვარის განაშენიანებასთან, სამშენებლო სამუშაოები არ მიმდინარეობს ქალაქ ბათუმის ბულვარის საკადასტრო ერთეულში, ბათუმის ბულვარს და შპს ” ამბასადორი ბათუმის” მიწის ნაკვეთს აქვთ სხვადასხვა კოდი და მისამართი”- ნათქვამია ბრძანებაში, რომელსაც აჭარის განათლების მინისტრმა ცოტა ხნის წინ მოაწერა ხელი. უახლოეს პერიოდში EMC საზოგადოება “ბათომის” სახელით მშენებლობის შეჩერების მოთხოვნით, სასამართლოს მიმართავს.
შეგახსენებთ, ბათუმის ბულვარში 16 სართულიანი სასტუმროსა და გამაჯანსაღებელი კომპლექსის მშენებლობაზე ნებართვა კულტურული მემკვიდრეობის დაცვის სააგენტომ 21 იანვარს გასცა, რასაც არაერთი აქცია მოყვა. მშენებლობის შეჩერების მოთხოვნით 5 ათასზე მეტი ხელმოწერა შეგროვდა. საზოგადოება “ბათომმა” და EMC-იმ ბათუმის ბულვარში მიმდინარე მშენებლობის ნებართვის კანონიერების შესწავლისა და მშენებლობის შეჩერების მოთხოვნით აჭარის განათლების მინისტრს 26 თებერვალს მიმართა.
