“ერთიანი ნაციონალური მოძრაობის” წევრმა გია აბულაძემ აჭარის სოფლის მეურნეობის სამინისტრო კორუფციული გზით 100 მილიონი ლარის გახარჯვაში დაადანაშაულა. როგორც გია აბულაძემ განაცხადა, რეალურად ეს თანხები გაქრა ბიუჯეტიდან, მაგრამ მოსახლეობის კეთილდღეობაზე არ ასახულა და მოუწოდა აუდიტის სამსახურს და საგამოძიებო ორგანოებს, დაინტერესდნენ ამ ფაქტით.
“ნაცვლად იმისა, რომ ხელისუფლება ცდილობდეს მოსახლეობის დასაქმებას, ისინი აღარიბებენ ხალხს და შემდგომ ცდილობენ კიტრითა და პომიდვრით მოიპოვონ საარჩევნო ხმები.
რეგიონის მოსახლეობის შეურაცხყოფაა, როცა ქობულეთში ქართული ოცნების აქტივისტები მოსახლეობას ურიგებენ კიტრსა და პომიდორს, რომლის მოყვანითაც დაკავებულია აჭარის სოფლის მეურნეობის სამინისტრო.რეგიონში სოფლის მეურნეობაში დაიხარჯა 100 მილიონ ლარამდე და ხელისუფლება ვერ გვეტყვის სოფლის მეურნეობის ვერცერთ მიმართულებას, რომელიც განვითარდა, რეალურად თანხები ისე ქრება რომ მოსახლეობამდე არ აღწევს.
აუდიტის სამსახურმა დაუყოვნებლივ დაიწყოს ბოლო წლებში სოფლის მეურნეობის პროგრამების განხორციელებისას საბიუჯეტო თანხების არამიზნობრივად ხარჯვის საკითხის შესწავლა
ასევე დაიწყოს გამოძიება ქობულეთში მოსყიდვის ფაქტთან დაკავშირებით
მივმართავთ არასამთავრობო ორგანიზაციებს შეფასება მიეცეს ქობულეთში მოსყიდვის ფაქტებს”, – განაცხადა გია აბულაძემ.
აჭარის სოფლის მეურნეობის მინისტრმა ტიტე აროშიძემ გია აბულაძის ბრალდებებს აბსურდული უწოდა და განაცხადა რომ მოსახლეობის კეთილდღეობაზე ზრუნვა მათი მიზანია.
“საგანგებო ბიუჯეტის ფარგლებში აჭარის მთავრობის მიერ მოხდა საგანგებო ბიუჯეტის შემუშავება, რომლის ერთ-ერთი მიზანი მოსახლეობის საკვებით უზრუნველყოფა გახლდათ.
ჩვენ სამი პროგრამა ავამუშავეთ. ეს იყო მიწების უფასოდ დამუშავება, საჩითილე მეურნეობების ამოქმედება და გადაცემა მოსახლეობაზე და მესამე, სასათბურე მეურნეობებში მოყვანილი პროდუქციის გადაცემა მოსახლეობაზე.
ჩვენ ვერ შევაჩერებდით ამ პროგრამებს იმის გამო, რომ ვიღაცა სხვანაირად იფიქრებდა. აბსურდულ განცხადებებს აკეთებენ. ჩვენ, ამას ვახირციელებთ მთელი აჭარის მასშტაბით. ამ ეტაპზე, ვინაიდან ქობულეთი ჩაკეტილი იყო, ოთხი სოფელი სრულად და განსაკუთრებით დაზარალდა, ტურისტული სეზონი ფაქტობრივად ჩავარდა, ქობულეთის მოწყვლად ჯგუფებზე მოხდა დარიგება.
მე მაქვს ხელთ ინფორმაცია, სამჯერ აქვთ წერილი მოწერილი და სამივეჯერ სხვადასხვა ინფორმაციას ითხოვენ. ადმინისტრაციულ ვადებში თავიდან ბოლომდე მოვახდინეთ სრული ინფორმაციის მიწოდება. ის ინფორმაცია, რომელსაც ითხოვენ, არის პერსონალური მონაცემები. ჩვენ, რა თქმა უნდა, ვერ მივაწვდით პერსონალურ მონაცემებს”- განაცხადა ტიტე არეშიძემ.
ავტორი: ნაირა ქობულაძე
