აჭარის ტელევიზიისა და რადიოს დირექტორის პირველ მოადგილედ აჭარის სავაჭრო-სამრეწველო პალატის თავმჯდომარე ნიკა ჩხარტიშვილი დაინიშნა. მან შეთავაზება აჭარის ტელევიზიის დირექტორისგან მიიღო.
როგორც გიორგი კოხრეიძე აცხადებს, ერთი თვის განმავლობაში აწარმოებდა მოლაპარაკებებს ნიკა ჩხარტიშვილთან.
„ვაკვირდებოდი პროცესებს და დავინახე, რომ საკმაოდ სერიოზული გამოწვევების წინაშე იდგა მაუწყებელი მენეჯერული კუთხით.
გარკვეული მიმართულებებით სერიოზული მხარდაჭერა და დახმარება მჭირდებოდა. ნიკა ჩხარტიშვილს ვიცნობ როგორც ძალიან კარგ მენეჯერს. ვაწარმოებდი მოლაპარაკებას და საბოლოოდ დავითანხმე, დამიდგეს გვერდში და ერთად შევძლოთ იმ პროცესების უკეთესად წარმართვა, რაც მაუწყებელს უკეთესად განვითარების საშუალებას მისცემს”- აცხადებს გიორგი კოხრეიძე.
როგორც ნიკა ჩხარტიშვილი აცხადებს, კონკრეტულ გეგმებზე ადგილზე სიტუაციის შესწავლისა და გაცნობის შემდეგ ისაუბრებს.
„აქ იქნება ძალიან ბევრი სამუშაო, აქ იქნება პასუხისმგებლიანი მიდგომა საჭირო იმისთვის, რომ კიდევ უკეთესი გახდეს აჭარის ტელევიზია. ტექნიკურ-მატერიალური ბაზა, ფინანსური შესაძლებლობები, რაც ტელევიზიას გააჩნია, ადამიანური რესურსები ინდა იყოს ოპტიმალურად მიმართული იქეთკენ, რომ ჩვენ რაც შეიძლება მეტი მოწყვლადი ჯგუფი მოვიცვათ, მეტი პროგრამა შევქმნათ, რათა საზოგადოებრივი მაუწყებლის იდეა იყოს სრულად განხორციელებული და აჭარის ტელევიზია გახდეს უფრო კონკურენტუნარიანი”- განაცხადა ნიკა ჩხარტიშვილმა.
ავტორი: ნაიარა ქობულაძე
