შინაგან საქმეთა სამინისტროში თამარ ბაჩალიაშვილის მშობელბისა და ოჯახის ადვოკატის შეხვედრა დასრულდა.
როგორც მიხეილ რამიშვილმა უწყების დატოვების შემდეგ ჟურნალისტებს განუცხადა, შეხვედრას ესწრებოდა შს მინისტრის მოადგილე ვლადიმერ ბორცვაძე და ცენტრალური კრიმინალური პოლიციის დეპარტამენტის ხელმძღვანელი მამუკა ჭელიძე.
„შევხვდით მინისტრის მოადგილეს, ბატონ ვლადიმერ ბორცვაძეს და ამ შეხვედრას ესწრებოდა ბატონი მამუკა ჭელიძე. როგორც ჩვენთვის ცნობილი გახდა ფედერალურ ბიუროსთან გაიგზავნა მოთხოვნა. აქ უკვე მიდის ის პროცესი, რომ უნდა ვიცოდეთ რაში იქნება თანამშრომლობა და რაში მიიღებს ფედერალური ბიურო მონაწილეობას.
ჩვენ გვაქვს ძალიან დიდი მოთხოვნა, რომ მაქსიმალურად იქნას გამოყენებული შესაძლებლობა, როგორც ექსპერტიზის თვალსაზრისით, ასევე ყველა კითხვაზე იყოს პასუხი გაცემული“, – განაცხადა მიხეილ რამიშვილმა.
მან დღეს ოფიციალურად დაადასტურა ინფორმაცია, რომ საქმეში დევს დრონით გადაღებული კადრები, თუმცა დიდი მოცულობის გამო, ჩანაწერების ნახვა დღეს ვერ მოხერხდა.
ამ დრომდე ვრცელდებოდა ინფორმაცია, თითქოს დრონის კადრები წაშლილია.
შეხვედრის დასრულების შემდეგ ცნობილი გახდა, რომ თამარ ბაჩალიაშვილის საქმე 12 ტომსს მოიცავს.
