„ბათუმის პოლიციამ და სასამართლომ ერთობლივად გადაწყვიტეს, რომ, დილაუთენია ჩაეტარებინათ პროცესი ადვოკატის და ჟურნალისტების გარეშე. მობილიზება გააკეთეს ბრალდებულების, მაგრამ მივუსწარი. წარვადგინე ორდერი. საქმის მასალების მიღებაზე იყო წინააღმდეგობა, მაგრამ როცა დავემუქრე, რომ მივიღებდი შესაბამის ზომებს, გადმომცეს. მოსამართლე კობა გოცირიძემ არ დამიკმაყოფილა შუამდგომლობა, რომ ერთი საათით გადაედო სხდომა და მოეცა საშუალება მიმეტანა დაკავებულების გამამართლებელი მტკიცებულება – ვიდეომასალა. მინდა გითხრათ დღეს სრულიად უსაფუძვლო, ყოველგვარი მტკიცებულებების გარეშე გამტყუნებული იქნა ეს შვიდი პირი, მათ შორის ერთი ქალბატონი ადმინისტრაციულ გადაცდომაში”- განაცხადა ადვოკატმა დავით ჯაფარიძემ.

ადვოკატის განცხადებით, დაცვის მხარე გადაწყვეტილებას გაასაჩივრებს.

სასამართლოს მიმდებარე ტერიტორიაზე აქციის მონაწილეებს, მათ მხარდამჭერებსა და პოლიციას შორის სიტყვიერი დაპირისპირება მოხდა.

„ჩვენ არ ვეთანხმებით სასამართლოს გადაწყვეტილებას. მოსამართლის გადაწყვეტილება უსამართლოა. სოციალურად დაუცველი ვარ და 1000 ლარით დამაჯარიმა. კიდევ კომენდანტის საათის დარღვევისთვის 2000 ლარით დაგვაჯარიმეს. როგორ უნდა გადავიხადო?

საკმარისია ამდენი შეზღუდვა. დღისით თუ არ ემართება კორონა ადამიანებს, ღამით დაემართებათ? დაიწყეს დაჭერები ძალის გადამეტებით. კადრებიც გვაქვს.

ჩვენ მოჭიდავეები ვართ, ჭიდაობა თუ უნდათ, ტატამზე გამოვიდნენ.

ჩვენ ვერც 2000 და ვერც 10 ათასი ლრით ვერ შეგვაშინებენ, ვერც დაჭერებით. ვაგრძელებთ ბოლომდე ბრძოლას ქართველი ხალხისთვის, სამშობლოსთვის, რათა უკეთეს ქვეყანაში ვიცხოვროთ. უნდა დავამთავროთ უსამართლობა ამ ქვეყანაში”- განაცხადა ერთ-ერთმა დაკავებულმა თამაზ ჭელიძემ.

შეგახსენებთ, გუშინ ბათუმში „კარფურის” მიმდებარე ტერიტორიაზე კომენდანტის საათის დროს მიმდინარე აქციაზე 11 პირი დააკავეს. მოგვიანებით ორი ხელწერილის საფუძველზე გაათავისუფლეს. ორის სასამართლო პროცესი კი ამ წუთებში მიმდინარეობს.