ბათუმში, აგვისტოს ომში დაღუპულთა მემორიალი ყვავილებით შეამკეს. 2008 წელს განვითარებული მოვლენები და გმირები ოჯახის წევრებმა, მოქალაქეებმა და პოლიტიკოსებმა გაიხსენეს. ისინი რუსეთ-საქართველოს ომში დაღუპულთა სკვერში შეიკრიბნენ, სადაც ომის მონაწილე ყოფილი ჯარისკაცებიც მივიდნენ.

აგვისტოს ომში დაღუპული სამხედროებიდან 17 ჯარისკაცი აჭარიდან იყო. ოჯახებს ერთჯერადი ფინანსური დახმარება აჭარის მთავრობამ წელსაც გადასცა.

„ჩვენი ბრძოლა თავისუფლებისთვის, ოკუპაციის წინააღმდეგ არ დასრულებულა. ეს ბრძოლა უნდა იყოს თანამიმდევრული, პრაგმატული და ყველა ერთად შევძლებთ დავძლიოთ მთავარი გამოწვევა, რასაც ჰქვია ოკუპაცია“, – განაცხადა აჭარის მთავრობის თავმჯდომარემ თორნიკე რიჟვაძემ.

აჭარაში ყველა ადმინისტრაციულ შენობაზე დროშებია დაშვებული.

შეგახსენებთ, რომ 2008 წლის აგვისტოს ომიდან 12 წელი გავიდა.