ხმაური და სიტყვიერი დაპირისპირება იყო ბათუმის მერიასთან გარემოვაჭრეებსა და მერიის წარმომადგენლებს შორის, სადაც გარემოვაჭრეები აქციას მართავენ. აქციის მონაწილეები ბათუმის მერის მოვალეობის შემსრულებელ არჩილ ჩიქოვანთან შეხვედრას ითხოვენ. როგორც აქციის მონაწილეები აცხადებენ, იმ ტერიტორიაზე, სადაც ისინი სამუშაოდ გადაიყვანეს, საქონლის რეალიზაციას ვერ ახერხებენ და ფალავანდიშვილის ქუჩაზე გარევაჭრობის უფლებას ითხოვენ.
„ქუჩაში ვვაჭრობდით. დამეთანხნებით ალბათ, რომ ზამთარში, სიცივესა და წვიმაში თუ ზაფხულის სიცხეში არავის არ უხარია ქუჩაში დგომა. მაგრამ შვილები გვყავს, გვიჭირს, სხვა შემოსავალი არ გვაქვს და იმიტომ ვიჭირვებდით. ორ კაპიკს ვშოულობდით და ოჯახებს იმით ვარჩენდით. აგვიკრძალეს გარევაჭრობა. კი მესმის, არ არის მიზანშეწონილი ქუჩებში გამოფენილი საქონელი, მაგრამ რა ვქნათ? ისეც ამ პანდემიის გამო ერთი წელი უმუშევარი ვიყავით. გადაგვიყვანეს ავტოსადგურის ტერიტორიაზე. დღე ისე გავა, ერთი ადამიანი არ შემოდის. რა აზრი აქვს იქ ყოფნას, საღამის პური ხომ უნდა მივუტანო შვილებს. სამი მოვაჭრე უკვე დააჯარიმეს 500-500 ლარით, რადგან გარეთ გამოვიდნენ თავისი ნებით. რა ვქნათ გვითხარით. შეგვხვდეს მერი და გაგვცეს პასუხი“, – აცხადებს აქციის ერთ-ერთი მონაწილე.
„გარევაჭრობა არის კანონით აკრძალული და ვერ იქნება ნებადართული. არის შესაბამისი სავაჭროვ დაწესებულებები, რაც შევთავაზეთ და შეუძლიათ იქ გააგრძელონ. მუშაობა“, – ანცხადებენ ბათუმის მუნიციპალურ ინსპექციაში.
ადგილზე მობილიზებული არიან სამართალდამცავები.
ავტორი: ნაირა ქობულაძე
