ბათუმში “კარფურის” მიმდებარე ტერიტორიაზე პოლიციასა და აქციის მონაწილეებს შორის, რომლებიც კომენდანტის საათს აპროტესტებდნენ და ქალაქის ქუჩებში მსვლელობას აწყობდნენ, სიტყვიერი და ფიზიკური დაპირისპირება მოხდა. დაკავებულია რამდენიმე ადამიანი.
დაკავებულთა ზუსტი რაოდენობა ამ ეტაპზე უცნობია.
როგორც აჭარის პოლიციის დეპარტამენტის უფროსის მოადგილე ირაკლი ჭედიამ განაცხადა, მოქალაქეები პოლიციისთვის წინააღმდეგობის გაწევის გამო დააკავეს.
„კომენდანტის საათის დროს გადაადგილდებოდნენ ქუჩაში ადამიანები. მივიდა პოლიციის ეკიპაჟი მათთან სიტუაციის გასარკვევად. გამოიჩინეს აგრესია პოლიციის მიმართ, მიაყენეს შეურაცხყოფა და არ დაემორჩილნენ კანონიერ მოთხოვნებს”- აცხადებს ირაკლი ჭედია.
შს სამინისტროს ინფორმაციით, დაკავებულია 11 პირი პოლიცის დაუმორჩილებლობისთვის ადმინისტრაციული წესით.
შეგახსენებთ, ალტერნატივას” ხელმძღვანელი ხათუნა ბერიძე და ოპოზიციის მხარდამჭერი სპორტსმენები ფირუზ წულუკიძის ხელმძღვანელობით სოციალური ქსელით მოქალაქეებს კომენდანტის საათის დარღვევისკენ მოუწოდებდნენ.
თვითონ გადაადგილდებოდნენ მხარდამჭერებთან ერთად ბათუმის ქუჩებში, რასაც პოლიციასთან დაპირისპირება მოჰყვა.
ავტორი: ნაირა ქობულაძე
