ბათუმში, 26 მაისის ქუჩაზე ჩამონგრეული კორპუსის მიმდებარე ტერიტორია, სამართალდამცველებმა, უსაფრთხოების მიზნით, ჯებირებით გადაკეტეს.
შემთხვევის ადგილზე ახლა მხოლოდ ექსპერტ – კრიმინალისტები მუშაობენ, რათა დაადგინონ არის თუ არა ჩამონგრეული კორპუსის გვერდით მდებარე შენობები მდგრადი და საცხოვრებლად უსაფრთხო.
პარალელურად სამართალდამცველების მიერ აღმართულ ჯებირებთან მოქალაქეები იკრიბებიან. ე.წ გლოვის კუთხესთან სათამაშოები და ყვავილები მიაქვთ, გარდაცვლილთა სულების პატივსაცემად სანტლებს ანთებენ.
ბათუმში, 26 მაისის ქუჩაზე, 8 ოქტომბრის ტრაგედიას სულ 9 ადამიანის სიცოცხლე ემსხვერპლა, მათგან სამი არასრულწლოვანია. ამ დრომდე საავადმყოფოში განაგრძობს მკურნალობას 37 წლის კაცი, რომლის ჯანმრთელობის მდგომარეობა დღეს დასტაბილურდა.
საცხოვრებელი კორპუსის ჩამონგრევის გამო სულ სამი პირი დააკავეს. შინაგან საქმეთა მინისტრი, ვახტანგ გომელაური არ გამორიცხავს, რომ მომხდართან დაკავშირებით პასუხისმგებელი პირებისა და დაკავებულთა რაოდენობა გაიზარდოს.
