გარემოს დაცვისა და ბუნებრივი რესურსების კომიტეტის თავმჯდომარე მაია ბითაძე მთავრობის ახალ დადგენილებას გამოეხმაურა, რომლითაც ბენზინის საწვავის ხარისხობრივი ნორმებზე კონტროლი გამკაცრდა:
„ქართული ოცნების“ ერთ-ერთი დაპირებაა ჰაერის დაბინძურების მინიმუმამდე დაყვანა და ევროპულ სტანდარტებთან გატოლება. შესაბამისად, ის გადაწყვეტილება, რომელიც მთავრობის სხდომაზე მიიღეს, არის კიდევ ერთი წინგადადგმული ნაბიჯი იმისთვის, რომ ქალაქებში ჰაერის ხარისხი გაუმჯობესდეს. ამით მიღწეული იქნება ჯანსაღი გარემო ჩვენი მოქალაქეებისთვის, რაც ძალიან მნიშვნელოვანია როგორც ჯანდაცვის, ასევე გარემოს დაცვის კუთხით. საწვავის ხარისხის კონტროლი 2016 წლიდან დაიწყო. სახელმწიფო აკონტროლებს საწვავს მისი შემადგენლობის მიხედვით, იღებს ბენზინის სინჯებს ტყვიის, გოგირდის და ოქტანობის რიცხვების მახასიათებლების კუთხით, თითოეულ ბენზინგასამართ სადგურში მონიტორინგი კეთდება“, – განაცხადა მაია ბითაძემ.
მთავრობის გადაწყვეტილებით, ცვლილება შევიდა „საავტომობილო ბენზინის ხარისხობრივი ნორმების შესახებ“ საქართველოს მთავრობის დადგენილებაში, რომელიც ითვალისწინებს ბენზინის საწვავის ხარისხობრივი ნორმების კიდევ უფრო დაახლოებას და შესაბამისი ევროპული დირექტივით განსაზღვრული ყველა მახასიათებლის ნორმის დადგენას. კერძოდ, ბენზინის ხარისხობრივ ნორმებს დაემატა ახალი პარამეტრები, რაც კიდევ უფრო გააუმჯობესებს წვის პროცესს ავტოსატრანსპორტო საშუალებებში. შედეგად, შემცირდება ატმოსფერულ ჰაერში აზოტის დიოქსიდისა და ნახშირჟანგის გაფრქვევები და ეს ეტაპობრივად ხელს შეუწყობს ჰაერის ხარისხის გაუმჯობესებას. ახალი პარამეტრების დამატება ბენზინის ფასზე გავლენას არ მოახდენს.
