„სამართლიანი არჩევნების“ დირექტორი, ელენე ნიჟარაძე უმრავლესობის ლიდერის, ირაკლი კობახიძის დღევანდელ განცხადებებს ეხმაურება. როგორც ნიჟარაძე ამბობს, ბოდიში „ქართულ ოცნებას“ აქვს მოსახდელი, რადგან ასეთი არჩევნები ჩაატარა.
„ბოდიში უნდა მოიხადოს საარჩევნო ადმინისტრაციამ და მმართველმა პარტიამ, „ქართულმა ოცნებამ“, რადგან ეს იყო მათ მიერ ჩატარებული არჩევნები. რეალურად ამან გამოიწვია სწორედ პოლიტიკური კრიზისი და არა „სამართლიანი არჩევნების“ შედეგებმა, სადაც ძალიან მცირე ხარვეზზეა საუბარი, რომელმაც ასევე პროცენტის ძალიან მცირე სხვაობა გამოიწვია“, – განაცხადა ნიჟარაძემ.
რაც შეეხეა იმ საკითხს, რომ ორგანიზაციამ დარღვევების შესახებ ნოემბერში იცოდა, ელენე ნიჟარაძე ამბობს, რომ მათ საზოგადოების ინფორმირებისთვის საკუთარი სტრატეგია აქვთ.
„ჩვენ არაფერს ვმალავდით. უბრალოდ, გვქონდა ჩვენი სტრატეგია, როგორ მიგვეწოდებინა საზოგადოებისთვის ინფორმაცია და ამაზე ვმუშაობდით. უნდა მოგვემზადებინა ანგარიში, ჩაგვეტარებინა პრესკონფერენცია, კონფერენცია მედიისთვის. „ქართულმა ოცნებამ“ ისეთ დონეზე ჩაატარა სრულიად სამარცხვინო მოლაპარაკებები ელჩების თანდასწრებით, რომლებსაც არასწორ ინფორმაციას აწვდიდა, თან ამბობს, რომ ვიცოდით, არასწორი იყოო და ამას იყენებდნენ მოლაპარაკებების პროცესში. არ მინდა მძიმედ შევაფასო, მაგრამ რბილად რომ ვთქვა, ძალიან არაკეთილსინდისიერი საქციელია“,- განაცხადა ნიჟარაძემ.
რაც შეეხება საარჩევნო უბნების ჩამონათვალს, ორმელსაც ირაკლი კობახიძე ითხოვს, ელენე ნიჟარაძე პასუხობს, რომ აღნიშნული ოქმები მათ შეუძლიათ, მოიძიონ ცესკო-ს ვებგვერდზე და გამოითხოვონ ცესკო-დან. მისივე თქმით, ეს არის ოფიციალური ოქმები და „სამართლიან არჩევნებს“ ცალკე დამატებითი ოქმები არ აქვს.
მისივე განამარტებით ახლა მმართველი გუნდი ცდილობს „ცესკოს“ ხარვეზები „სამართლიან არჩევნებს“ დააბრალოს.
ნახეთ დეტალურად ირაკლი კობახიძის დღევანდელი განცხადებები: ISFED-მა წარმოადგინოს საარჩევნო უბნები, სადაც ბიულეტენების სიჭარბე გამოვლინდა, ან ბოდიში მოუხადოს საზოგადოებას – ირაკლი კობახიძე
მაქსიმალურად შევეცადეთ, ISFED-ისთვის რეპუტაციული ზიანი აგვერიდებინა – ირაკლი კობახიძე
