შინაგან საქმეთა სამინისტროს დანაყოფების თანამშრომლების მიერ განხორციელებული მონიტორინგის შედეგად, ბოლო 24 საათის განმავლობაში მთელი ქვეყნის მასშტაბით, დაწესებული შეზღუდვების ფარგლებში მოქმედი რეგულაციების დარღვევი 368 ფაქტი გამოვლინდა. ინფორმაციას შსს ავრცელებს.
პოლიციამ ადმინისტრაციულ სამართალდარღვევათა კოდექსის 42(10)-ე მუხლის შესაბამისად 87 ფიზიკური პირი დააჯარიმა, მათ შორის ის მოქალაქეებიც, რომლებმაც 21 საათიდან დილის 5 საათამდე დაწესებული გადაადგილების შეზღუდვის წესი დაარღვიეს.
ამასთან ერთად, ბოლო 24 საათში პირბადის ტარების წესის დარღვევის ფაქტზე, აღნიშნული კოდექსის 42(11)-ე მუხლის შესაბამისად 281 ფიზიკური პირი დაჯარიმდა. ამ წესის დარღვევა ასკ-ის 42(11) -ე მუხლის მიხედვით, მოქალაქის 20 ლარის ოდენობით დაჯარიმებას იწვევს.
რაც შეეხება, იზოლაციისა და კარანტინის წესის დარღვევას – ადმინისტრაციული სამართლის კოდექსის 42(10)-ე მუხლის შესაბამისად, ფიზიკური პირის 2 000 ლარით, ხოლო იურიდიული პირის – 10 000 ლარის ოდენობით დაჯარიმებას გულისხმობს. უნდა აღინიშნოს, რომ განმეორებითი ჯარიმა სისხლისსამართლებრივ პასუხისმგებლობას ითვალისწინებს.
„შინაგან საქმეთა სამინისტრო კვლავ მოუწოდებს მოქალაქეებს, დაიცვან დაწესებული შეზღუდვები, წინააღმდეგ შემთხვევაში, გამოყენებული იქნება კანონით გათვალისწინებული, შესაბამისი ზომები. საქართველოს ტერიტორიაზე მყოფი ყველა პირი ვალდებულია, დაემორჩილოს საზოგადოებრივი ჯანმრთელობის სფეროში მოქმედ საქართველოს კანონმდებლობის მოთხოვნებს“ – ნათქვამია განცხადებაში.
ავტორი: ამუკა ქორიძე
