დიდი ბრიტანეთის პრემიერ-მინისტრის, ბორის ჯონსონის განცხადებით, კორონავირუსი დიდი ბრიტანეთისთვის ნამდვილი „კატასტროფა“ იყო. ინფორმაციას Guardian-ი ავრცელებს.
„ეს იყო კატასტროფა, ნამდვილი კოშმარი იყო. ამ ყველაფერმა ქვეყანა ღრმა შოკში ჩააგდო. ასეთ მომენტებში არის ხოლმე შესაძლებლობა, რომ სიტუაცია უკეთესობისკენ შეიცვალოს და უფრო მეტი გაკეთდეს. ჩვენ ძალიან გვინდა, რომ მეტი გავაკეთოთ, უკეთესად ვიმოქმედოთ. მეტი ინვესტიცია ჩავდოთ ინფრასტრქუტრურასა და ტრანსპორტში“,- განაცხადა ბორის ჯონსონმა.
მისი თქმით, ვირუსზე სახელმწიფოს რეაგირება აუცილებლად უნდა იქნას გამოკვლეული. თუმცა, როგორც მან აღნიშნა, ეს მოგვიანებით უნდა მოხდეს.
„ჩვენ ეს პასუხისმგებლობა გვაკისრია მათ მიმართ, რომლებიც ვირუსმა იმსხვერპლა, რომლებიც ამისგან იტანჯებოდნენ. უნდა ვიცოდეთ რა გაკეთდა არასწორად და როდის. ამას ძალიან კარგად ვხვდები და აუცილებლად გავაკეთებ. თუმცა, ვფიქრობ, რომ ახლა ამისთვის სწორი დრო არ არის, რადგან ისევ პანდემიასთან ბრძოლის პერიოდში ვართ. მაგრამ ჩვენ ვსწავლობთ წარსულისგან და მომავალში აუცილებლად სწორ დასკვნებს გამოვიტანთ“,- აცხადებს ჯონსონი.
