„ევროპული საქართველოს“ ფოთის, ხობისა და სენაკის მაჟორიტარობის კანდიდატმა გიგა ბოკერიამ საკუთარი არჩევანი ფოთში, მე-13 საარჩევნო უბანზე გააკეთა, სადაც მეუღლესთან ერთად მივიდა.

„ჩვენს ქვეყანაში ცვლილებების დასაწყისის დღეა, დღე, როცა ჩვენი მოქალაქეები გააკეთებენ არჩევანს და ცვლილებებისთვის დიდ ნაბიჯს გადადგამენ. ივანიშვილის ხელისუფლების შეცვლას უნდა მოყვეს გარდამტეხი ცვლილებები ჩვენს ცხოვრებაში და ეს არის ჩემი გუნდის, „ევროპული საქართველოს“ ამოცანა და გავრისკავდი და ვიტყოდი, რომ ეს არის ჩვენი ქვეყნის ამოცანა. ყველა ხმას აქვს მნიშვნელობა იმისთვის, რომ ივანიშვილის მმართველობის პირობებში, დიდი უპირატესობით დავამარცხოთ ის. ჩვენი ამოცანაა, რომ ყოველგვარი ინციდენტების გარეშე შევცვალოთ ეს ხელისუფლება და ეს შედეგიც უნდა დადგეს დღეს, დღის ბოლოს,“ – განაცხადა გიგა ბოკერიამ.

დღეს, 31 ოქტომბერს საქართველოში საპარლამენტო არჩევნები მიმდინარეობს. ამომრჩეველთა ერთიან სიაში სულ 3 205 634 ამომრჩეველია რეგისტრირებული. ქვეყნის მასშტაბით გახსნილია 3 657 საარჩევნო უბანი. იმ ამომრჩევლებისთვის, რომლებიც იმყოფებიან სამკურნალო დაწესებულებებში, კარანტინსა და თვითიზოლაციაში, ცალკე დამატებით შეიქმნა 127 სპეციალური საარჩევნო უბანი.

არჩევნებში 48 პოლიტიკური პარტია და ორი საარჩევნო ბლოკი მონაწილეობს.