საქართველოს ფეხბურთის ფედერაციის პრეზიდენტმა „პოსტივის“ ეთერში ოქტომბერში გასამართ ერთა ლიგის ფლეი-ოფის შეხვედრაზე ისაუბრა.
ლევან კობიაშვილი გულშემატკივრების დასწრების საკითხს შეეხო და აღნიშნა, რომ შესაძლოა მატჩზე ქომაგების გარკვეული რაოდენობა დაუშვან. კობიაშვილს წინაპირობად სუპერთასის მატჩი მოყავს, რომელიც სექტემბერშ უნგრეთში უნდა ჩატარდეს და უეფას გადაწყვეტილებით შეხვედრას გულშემატკივრების გარკვეული რაოდენობა დაესწრება.
„გვახსოვს, წლების წინ თავისუფლად შევდიოდით სავსე სტადიონზე, თუმცა ასე სავარაუდოდ აღარ იქნება. შინაგანი განწყობა მაქვს, რომ მაყურებლის რაღაც რაოდენობა დაშვებული იქნება და რატომ: სექტემბრის თამაშებამდე ერთი თვით ადრე ვიცოდით, რომ მატჩებს გულშემატკივრები ვერ დაესწრებოდნენ, თუმცა უეფა-ს მხრიდან მაშინვე გაკეთდა ერთი განცხადება, რომ სუპერ თასზე, რომელიც უნგრეთში ჩატარდება, გულშემატკივრების გარკვეული რაოდენობა დაუშვეს. მგონია, რომ ეს იქნება ამის წინაპირობა, შევხედოთ როგორ განვითარდება იქ მოვლენები. თუ ყველაფერი კარგად ჩაივლის და არანაირი პრობლემა არ შეიქმნება, სავარაუდოდ ეს გახდება საფუძველი, ოქტომბრის თამაშებზე გულშემატკივრების დაშვების. თუმცა, ეს არის მხოლოდ ჩემი ლოგიკა და ჩემი გადმოსახედიდან დანახული გამოსავალი“, – განაცხადა ლევან კობიაშვილმა.
შეგახსენებთ, რომ ერთა ლიგის ფლეი-ოფის მატჩი საქართველოსა და ბელარუსის ნაკრებებს შორის 8 ოქტომბერს გაიმართება.
