ჯანდაცვის სამინისტროსთან, ექიმებმა საპროტესტო აქცია გამართეს. 33 სამედიცინო ასოციაციის ექიმმა, დაკავებული კოლეგის, ვახტანგ ყიფიანის პატიმრობაში დატოვება გააპროტესტა.
ექიმები სოლიდარობა გამოუცხადეს დაკავებულ კოლეგას და მისი გათავისუფლება მოითხოვეს. მათი თქმით, რეგულირების სააგენტოს აქტი, რომლითაც პროკურატურა ხელმძღვანელობს, არ პასუხობს თანამედროვე მედიცინის მოთხოვნებს და მისი გადახედვა მოითხოვეს.
შეგახსენებთ, 4 აგვისტოს პროკურატურამ გაავრცელა ინფორმაცია თბილისის ცენტრალური საავადმყოფოს დირექტორისა და ექიმების დაკავების შესახებ. უწყების ცნობით, კლინიკის ექიმმა პაციენტი დაარწმუნა, რომ ქირურგიულ ოპერაციას იტალიიდან მოწვეული ექიმები ჩაუტარებდნენ, თუმცა ოპერაცია, შესაბამისი ლიცენზიის გარეშე, თავად გაუკეთა.
უწყების ინფორმაციით, ყიფიანმა ოპერაციაზე დაიხმარა მაგდა ხოჭოლავა, „რომელსაც ასევე არ გააჩნდა სახელმწიფო და/ან დროებითი სერტიფიკატი არც ერთ სპეციალობაში და იგი საავადმყოფოში ხელშეკრულების საფუძველზე კონსულტანტის თანამდებობაზე მუშაობდა“. პროკურატურის ინფორმაციით, ოპერაციის შემდეგ პაციენტი ამ დრომდე კომაშია.
ექიმები და კლინიკა ბრალს უარყოფენ. თბილისის საქალაქო სასამართლოს გადაწყვეტილებით, გიორგი ლობჟანიძეს, ანუ ცენტრალური საავადმყოფოს დირექტორს, მოსამართლემ 100 000-ლარიანი გირაო შეუფარდა, ხოჭოლავას და ყიფიანს კი — წინასწარი პატიმრობა. გამომდინარე იქიდან, რომ ხოჭოლავა საქართველოში არ იმყოფება, მას წინასწარი პატიმრობა დაუსწრებლად შეეფარდა.
