დამიდოს FBI-მ დასკვნა, რომ თვითმკვლელობაა და მაშინ დავიჯერებ! – ასე ეხმაურება თეონა ბაჩალიაშვილის დედა შსს-ს განცხადებას. თეონა თამაზაშვილის კომენტარს „ინტერპრესნიუსი“ ავრცელებს.
გარდაცვლილი გოგონას დედა საქმეში კვლავ FBI-ის ჩართვას ითხოვს და შინაგან საქმეთა სამინისტროს უნდობლობას უცხადებს.
„არ მჯერა მე მათი! ეს ინფორმაცია ნამდვილად არ არის სარწმუნო, იქნებ ისიც ნახეს ინტერნეტში, რომ თეთრიწყაროს რაიონში უფრო ადვილი იყო სიკვდილი და სხვაგან არა? დღეს ვიყავი ჭელიძესთან შეხვედრაზე და ვუთხარი კიდეც, ბავშვი სახლში მოსვენებული არ იყო და წერილი, მედიკამენტები მაშინვე იპოვეთ, ასევე ფსიქოლოგი და მკვლელი ვერ იპოვეთ, მაშინვე გინდოდათ თვითმკვლელობის იარლიყი მიგეკერებინათ-მეთქი. ისევ თავიდან აამოქმედეს ეს ყველაფერი, რადგან საქმეში FBI-ის ჩართულობა მოვითხოვეთ. კი ბატონო, დამიდოს FBI-მ დასკვნა, რომ თვითმკვლელობაა და მაშინ დავიჯერებ, რომ თვითმკვლელობაა, არ მჯერა მე მათი! ახლა უფრო გავძლიერდებით და ახლა უფრო მოვითხოვთ FBI-ს ჩართულობას“, – ამბობს თეონა თამაზაშვილი.
შეგახსენებთ, რომ შსს-მ ბაჩალიაშვილის საქმეზე მის კომპიუტერზე ჩატარებული ექსპერტიზის დასკვნა გაასაჯაროვა. უწყების ინფორმაციით, ექსპერტიზას ესწრებოდა ბაჩალიაშვილების ოჯახის ადვოკატი, მიხეილ რამიშვილიც.
ექსპერტიზის შედეგად დგინდება, რომ გაუჩინარების წინა დღეს, ბაჩალიაშვილი Google-ში არკვევდა, როგორ უქმდება „ფეისბუქი“ სიკვდილის შემდეგ. ასევე, შსს-ს ინფორმაციით, 1 თვით ადრე ბაჩალიაშვილი ასევე Google-ში თვითმკვლელობის მეთოდებს და ურეცეპტოდ გაყიდვად წამლებს ეძებდა.
