შეთანხმების მიღწევა რეალისტურია იმ ჯანსაღ ოპოზიციურ პარტიებთან, რომლებიც დესტრუქციულ სცენარს და ანტიდასავლურ კამპანიას გაემიჯნენ, – ამის შესახებ პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემ განაცხადა.
მისივე თქმით, პატარა პარტიები მიხვდნენ, რომ არჩევნების ე.წ. გაყალბების თეორიას რეალობასთან კავშირი არ აქვს.
„ზოგადად, მმართველ გუნდს მეხუთე რაუნდისთვის პოზიტიური მოლოდინი აქვს, რადგან ორ თვეში ბევრი რაღაც შეიცვალა – საერთაშორისო ორგანიზაციების მხრიდან საბოლოო შედეგები დაიდო, მთელმა მსოფლიომ არჩევნები აღიარა და ამ ყველაფერს „სამართლიანი არჩევნების“ ცნობილი სკანდალი დაერთო, რაც ოპოზიციისთვის ერთ-ერთი მთავარი არგუმენტი იყო, რომ ვითომდა, არჩევნები გაყალბდა. საბოლოო ჯამში, აღმოჩნდა, რომ „სამართლიანი არჩევნების“ პარალელური დათვლის შედეგები ცესკო-ს მონაცემებს ერთი-ერთში დაემთხვა. ამ შედეგებისა და ფაქტების ერთობლიობამ ზოგიერთ ოპოზიციურ პარტიას აჩვენა, რომ ისინი იმ პოლიტიკურ თამაშში შევიდნენ, რომელიც უშედეგოა და მათი განცხადებებიც ადასტურებს, რომ ცდილობენ, ხელისუფლებასთან კომპრომისი მოძებნონ. დარწმუნებული ვარ, ამ კომპრომისს მოვძებნით“, – განაცხადა სამხარაძემ.
წყარო: პირველი არხი
