„დღევანდელმა დღემ აჩვენა, რომ პოლიტიკურ დევნას, დაპირისპირებას, ზიზღს, აგრესიას, რომლის გამოწვევასაც „ქართული ოცნება“ მუდმივად ცდილობს, მომავალი არ აქვს“, – ამის შესახებ „ევროპული საქართველოს“ წევრმა, დავით ბაქრაძემ „ნაციონალური მოძრაობის“ ოფისში გამართულ ბრიფინგზე განაცხადა, სადაც ოპოზიციის ლიდერები არიან შეკრებილნი.
დავით ბაქრაძის განცხადებით, გიორგი გახარიამ ამ ნაბიჯით გააჩინა შანსი, „ქართულ ოცნება“ გონს მოეგოს და დაუბრუნდეს მოკლაპარაკების მაგიდას.
მისი თქმით, შექმნილი პოლიტიკური კრიზისი მოლაპარაკებების გზით უნდა განიმუხტოს.
„დავუბრუნდეთ მოლაპარაკებათა მაგიდას და იმ საკითხების განხილვას, რომლებიც აუცილებელია ქვეყანაში სიმშვიდისა და ნორმალური მომავლისთვის. ეს გახლავთ რიგგარეშე არჩევნები, პოლიტიკური დევნის შეწყვეტა, პოლიტიკურად მოტივირებული პროცესების დასრულება, საარჩევნო სისტემის იმგვარად ცვლილება, რომელიც ყველა მომავალ არჩევნებს ნორმალურად ჩაატარებს“, – აღნიშნა დავით ბაქრაძემ.
გიორგი გახარიამ პრემიერ-მინისტრის თანამდებობა დატოვა. პრემიერ-მინისტრის გადადგომასთან დაკავშირებით, შინაგან საქმეთა სამინისტრომ ნიკანორ მელიას საქმეზე დაგეგმილი ღონისძიება დროებით გადადო.
